UASHINGTON- Sekretari i Shtetit i SHBA-së, Marco Rubio, u dha udhëzime diplomatëve amerikanë në mbarë botën që të mos komentojnë mbi drejtësinë ose integritetin e zgjedhjeve të zhvilluara nga vendet e huaja. Sipas Reuters, ky urdhër shënon një ndryshim të rëndësishëm nga qasja tradicionale e Uashingtonit për promovimin e zgjedhjeve të lira dhe të ndershme jashtë vendit. Urdhri, i dërguar në të gjitha postet diplomatike amerikane në një kabllogram të brendshëm të Departamentit të Shtetit më 17 korrik, thotë se Departamenti nuk do të lëshojë më deklarata në lidhje me zgjedhjet ose postime në mediat sociale nga Uashingtoni, përveç nëse ka një interes "të qartë dhe bindës" të politikës së jashtme.
“Kur është e përshtatshme të komentojmë për zgjedhjet e huaja, mesazhi ynë duhet të jetë i shkurtër, i përqendruar në përgëzimin e kandidatit fitues dhe, kur është e përshtatshme, në vënien në dukje të interesave të përbashkëta të politikës së jashtme”, thuhej në kabllogram, i cili ishte shënuar si “i ndjeshëm”, por jo i klasifikuar.
“Mesazhet duhet të shmangin dhënien e mendimeve mbi drejtësinë ose integritetin e një procesi zgjedhor, legjitimitetin e tij ose vlerat demokratike të vendit në fjalë,”-shkruhej ndër të tjera. Mesazhet në lidhje me zgjedhjet duhet të vijnë ose nga vetë Sekretari ose nga zëdhënësi i Departamentit dhe u ndaloi diplomatëve amerikanë të lëshonin deklarata të tilla pa miratimin e qartë nga udhëheqja e lartë e agjencisë.
Kabllogrami i referohej fjalimit të Presidentit Donald Trump më 13 maj në Riad, kur ai kritikoi ata që i quajti “ndërhyrës perëndimorë” që u tregojnë vendeve të Lindjes së Mesme se si të qeverisin punët e tyre, duke thënë se kjo nuk ishte më punë e Uashingtonit.
Kur u pyet në lidhje me kabllogramin, një zëdhënës i Departamentit të Shtetit përsëriti në komentet e dërguara me email disa nga pikat në direktivë dhe tha se kjo qasje ishte në përputhje me theksin e administratës mbi “sovranitetin kombëtar”.
Shtetet e Bashkuara tradicionalisht e kanë parë promovimin e të drejtave të njeriut dhe demokracisë, si dhe lirinë e shtypit, si një objektiv thelbësor të politikës së jashtme, megjithëse kritikët kanë theksuar vazhdimisht standardin e dyfishtë që Uashingtoni ka pasur ndaj aleatëve.
Zyrtarët e Trump kanë ndërhyrë vazhdimisht në politikën evropiane për të denoncuar atë që e shohin si shtypje të udhëheqësve të krahut të djathtë, përfshirë në Rumani, Gjermani dhe Francë, duke akuzuar autoritetet evropiane për censurimin e pikëpamjeve të tilla si kritika ndaj ligjeve të emigracionit./ZËRI
