BELGJIKË-Autoritet belge kanë ngritur alarmin për një sulm terrorist ndaj politikanëve belg. Mediat e huaja raportojnë se tre persona u arrestuan me akuzën e planifikimit të një “sulmi terrorist të frymëzuar nga xhihadistët” që synonte kryeministrin Bart De Wever.
"Arrestimet u kryen si pjesë e një hetimi për “tentativë vrasjeje terroriste dhe pjesëmarrje në veprimin e një grupi terrorist”, shpjegoi kreu i zyrës së prokurorit federal, Anne Franssen, në një konferencë për shtyp në Bruksel.
Policia kontrolloi një shtëpi disa qindra metra larg rezidencës së Bart De Wever në Antwerp. Gjatë kontrollit të shtëpisë së njërit prej të dyshuarve, u gjet një pajisje shpërthyese e improvizuar, e cila ende nuk ishte funksionale, si dhe një çantë shpine që përmbante topa metalikë. Një printer 3D u gjet në shtëpinë e të dyshuarit të dytë, “të cilin dyshojmë se do ta përdornin për të prodhuar objekte që do t’u shërbenin në kryerjen e sulmit”, tha Fransen.
Dy prej tyre dhanë deklarata në policinë gjyqësore dhe do të nxirren para një hetuesi nesër, ndërsa i treti pas marrjes në pyetje u la i lirë./ZËRI
