IRAN-Një rekord i trishtueshëm botëror: Shoqëria iraniane po jeton nën mbylljen më të gjatë të internetit të imponuar ndonjëherë ndaj një shteti të tërë në të gjithë botën.
Sipas monitoruesit ndërkombëtar NetBlocks, Irani ka hyrë në ditën e 37-të radhazi pa qasje në rrjetin global. NetBlocks konfirmon se ky incident tejkalon çdo rast tjetër të ngjashëm për nga ashpërsia dhe kohëzgjatja. Për momentin, në vend funksionon vetëm një rrjet lokal jashtëzakonisht i kufizuar, i cili lejon qasjen në faqe shtetërore, por jo në rrjetin global.
Në janar, vendi kaloi një ndërprerje 18-ditore gjatë protestave antiqeveritare, ku mbetën të vrarë mijëra njerëz. Megjithatë, bllokada aktuale e lidhur me luftën ka hyrë në një dimension të paparë, duke e lënë shoqërinë iraniane në një vakum informativ mes flakëve të konfliktit.
Më parë, ishte Sudani kombi që u mohoi qytetarëve të tij internetin për kohën më të gjatë: nga 3 qershori 2019 deri më 9 korrik 2019, qasja në vendin afrikan u bllokua pothuajse plotësisht, me 36 ditë të plota.
