Ushtria izraelite po bombardon sot Rripin e Gazës, përfshirë Rafahun, një ditë pasi Gjykata Ndërkombëtare e Drejtësisë e urdhëroi atë të ndalonte operacionet atje, mes përpjekjeve në Paris për të ndërmjetësuar një armëpushim midis Izraelit dhe Hamasit. Gjykata Ndërkombëtare e Drejtësisë, autoriteti më i lartë gjyqësor i OKB-së, urdhëroi gjithashtu Izraelin të mbajë të hapur kalimin Rafah, i cili është thelbësor për hyrjen e ndihmave humanitare, por që është mbyllur që nga fillimi i operacionit tokësor në fillim të majit.
Në vazhdën e vendimit të djeshëm të Gjykatës Ndërkombëtare të Drejtësisë, bombardimet izraelite vazhduan në Rripin e Gazës. Po kështu janë edhe përplasjet mes ushtrisë izraelite dhe krahut të armatosur të Hamasit. Herët në mëngjes, sipas dëshmive të palestinezëve si dhe ekipeve të AFP-së, ka pasur sulme izraelite në Rafah (në jug) si dhe në Deir al-Balakh (në qendër).
"Ne shpresojmë që vendimi i Gjykatës do të ushtrojë presion mbi Izraelin për t'i dhënë fund kësaj lufte shfarosjeje, sepse nuk ka mbetur asgjë këtu," i tha AFP-së Umm Mohammad Al-Asqa , një palestineze nga qyteti i Gazës, e cila është zhvendosur nga përleshjet në Deir al-Balakh.
“Por Izraeli është një shtet që e konsideron veten mbi ligjin. Pra, nuk besoj se goditjet apo lufta do të mund të ndalen në ndonjë mënyrë tjetër përveçse me dhunë”, tha Mohamed Saleh, i cili foli për AFP në këtë qytet që ndodhet në pjesën qendrore të enklavës palestineze.
Lufta filloi më 7 tetor pasi komandot e Hamasit, të cilët depërtuan në territorin izraelit nga Rripi i Gazës, sulmuan territorin izraelit, duke vrarë të paktën 1,170 njerëz, kryesisht civilë, sipas një raporti të AFP-së bazuar në shifrat zyrtare izraelite./ZËRI
