GREQI- Policia greke ka vënë një pranga një 32-vjeçar turk që dyshohet se ka nxjerrë në pritë gjashtë personat e ekzekutuar në masakrën e 11 shtatorit në Athinë. Protothema shkruan se i riu turk është kapur teksa tentonte të largohej nga Greqia në drejtim të Turqisë. Ai u ndalua në kufi ku gjatë kontrollit iu gjetën armë zjarri, 4 gëzhoja 9 mm dhe 2 karta identiteti të falsifikuara.
Dyshimet se personi në fjalë kishte lidhje me ekzekutimin e shumëfishtë u përforcua edhe pas marrjes në pyetje të banorëve të zonës, të cilët tregonin se turkun e kishin parë me një prej gjashtë personave që mbetën viktima të sulmit. Media turke, Yeni Safak shkruan se gjashtë turqit, të njohur si bashkëpunëtorë të mafiozit Baris Boyun u nxorrën në pritë me anë të një mesazhi që dyshohet se u ka dërguar 32-vjeçari i arrestuar sot, emri i të cilit nuk është publikuar ende.
“Pozicioni yt është zbuluar, dil menjëherë nga shtëpia, do të të vrasin,”- ka qenë mesazhi që mbërriti në telefonin e njërit prej të viktimave që bëri që të gjithë të braktisnin apartamentin e marrë me qira në Lutsa, Athinë, për të qëndruar larg syrit të rivalëve.
Mirëpo, vetëm dy kilometra larg banesës, ranë në pritën e përgatitur dhe mbetën të vrarë. Automjeti me të cilin ata udhëtonin ishte me targa gjermane false dhe i përket një shtetasi rumun, i cili ua kishte dhënë viktimave. Hetimet vijojnë dhe rumuni, pronari i automjetit është gjithashtu një prej të dyshuarve.
Sipas ekspertizave mjeko-ligjore, vrasësit e gjashtë turqve kanë përdorur katër armë zjarri, dy prej të cilave pistoletë. Viktimat janë identifikuar si: Doruk Ersu Büyüktunç, Abdurrahman Tekrü, Ömer Kanza, Ozan Kaan Tozlu, Barış Çağan dhe Burak Tahmaz.
Në celularët e viktimave janë gjetur mesazhe të shkruara në gjuhën turke. Grupi hetimor po analizon përmbajtjen e tyre për të përcaktuar se me kë kanë folur dhe për çfarë, biseda që mund të hedhin dritë mbi masakrën e ndodhur.
Viktimat kishin ngritur një grup kriminal që vepronte në vendet e BE-së, por jo në Greqi. Ata njiheshin si bashkëpunëtorë të ngushtë të mafiozit turk, Baris Boyun.
Ngjarja duket se nuk do të ndalet me kaq, pasi në një profil në Tik Tok është postuar një foto ku shihen 6 personat e ekzekutuar, duke lënë edhe një mbishkrim: Ne hakmerremi!
