SHBA- Presidenti amerikan Donald Trump i lëshoi një paralajmërim të ri homologut të tij rus, Vladimir Putinit, duke i kujtuar atij në një postim se ai e ka ndihmuar Rusinë. Trump, është sërish në konflikt me Vladimir Putinin, teksa thotë në një postim në "Truth Social" se presidenti rus po “luan me zjarrin”.
“Ajo që Vladimir Putin nuk e kupton është se nëse nuk do të ishte për mua, shumë gjëra të këqija do të kishin ndodhur tashmë në Rusi - dhe dua të them gjëra VËRTET të këqija. Ai po luan me zjarrin!,”-thotë Trump.
Të dielën, presidenti amerikan tha se është thellësisht i pakënaqur me Vladimir Putinin dhe sulmet e tij ndaj Ukrainës. Trump dhe Putin deklarojnë veten “miq”, thonë se e respektojnë njëri-tjetrin, pavarësisht se udhëheqin dy vende me interesa të kundërta. “Flirtimi” politik midis dy presidentëve ka një historik, por evoluoi në mënyrë dinamike gjatë pushtimit rus të Ukrainës, dhe ndoshta përfundimi i miqësisë së tyre do të vendoset në këtë çështje, së bashku me të ardhmen e Evropës dhe planetit.
Presidenti amerikan u rizgjodh duke premtuar se mund t’i jepte fund luftës në Ukrainë brenda 100 ditëve, por ende nuk e ka arritur synimin e tij edhe pse ka 4 muaj që nga kthimi i tij në Shtëpinë e Bardhë. Presidenti rus këmbëngul se nëse lufta nuk ndalet sipas kushteve të tij, ai do të marrë kontrollin e të gjithë vendit, pra të Ukrainës.
A po e shantazhon Putini mikun e tij amerikan?
Ka mjaft kolumnistë dhe komentatorë, në SHBA dhe Evropë, të cilët besojnë se Putini në një farë mënyre po e mban nën kontroll Trumpin.
Disa po sjellin teori që e lidhin qëndrimin "e butë" të Trump me biznesin e tij, dhe ndoshta lloje të tjera marrëveshjesh, në Rusi. Një pikë kyçe në këto teori është organizimi i konkursit të bukurisë Miss Universe në Moskë në nëntor 2013 nga kompania e Trump kundrejt një tarife prej 20 milionë dollarësh, e cila u pagua nga biznesmenë rusë. Pretendohet se shërbimet ruse të inteligjencës posedojnë dokumente nga "aventurat rozë" të Trump, si dhe prova të tjera me të cilat Putini po shantazhon "mikun" e tij amerikan. Por Trump dhe avokatët e tij i kanë mohuar këto akuza./ZËRI
