SARAJEVË- Komisioni Qendror Zgjedhor i Bosnjës dhe Hercegovinës i ka hequr mandatin Milorad Dodik, Presidentit të Republikës Srpska, i cili u dënua javën e kaluar me një vit burg dhe një ndalim 6-vjeçar që të kryejë detyra zyrtare. Vendimi u mor unanimisht nga të gjithë anëtarët e KQZ-së. Siç është njoftuar më parë, do të ketë një afat për ankesat, dhe pas kësaj, pritet të shpallen zgjedhje të parakohshme brenda një periudhe prej 90 ditësh. Kjo do të thotë se Milorad Dodik nuk do të jetë më president i Republika Srpska.
Diku rreth mesditës, Milorad Dodik u "prononcua" në profilin e tij në rrjetin social "X", duke cituar betimin që bëri kur mori postin e presidentit të Republika Srpska.
"Siç edhe u betova: Betohem se do t'i kryej detyrat e mia me ndërgjegje dhe përgjegjësi, do të mbroj sekretet shtetërore, do të mbroj dhe përfaqësoj interesat e popullit dhe qytetarëve të Republikës Srpska, dhe do të respektoj me nder Kushtetutën dhe ligjet e Bosnjës dhe Hercegovinës dhe Republikës Srpska."
Por nuk u ndal me kaq. Pas vendimit për mandatin e tij, shkroi edhe: Po sikur të refuzoj?
Pse Milorad Dodikut iu hoq mandati dhe pse u shpall vendimi?
Problemet e Milorad Dodik filluan në vitin 2023, kur Asambleja Kombëtare e Republikës Srpska miratoi një ligj sipas të cilit vendimet e Përfaqësuesit të Lartë në BiH nuk do të publikohen në Gazetën Zyrtare të RS, as nuk do të zbatohen në Republikën Srpska. Menjëherë pas kësaj, përfaqësuesi i Lartë i komunitetit ndërkombëtar për Bosnje-Hercegovinën, Christian Schmidt e anuloi atë ligj, por Milorad Dodik e injoroi dhe nënshkroi dekretin për shpalljen e ligjit. Ndërkohë, Schmidt ndryshoi edhe Kodin Penal të Bosnjës dhe Hercegovinës, sipas të cilit moszbatimi i vendimeve të Përfaqësuesit të Lartë përbën vepër penale. Dhe duke marrë parasysh që Dodik i injoroi të gjitha këto, Prokuroria ngriti një padi kundër Dodik dhe drejtorit të Fletores Zyrtare të RS-së, Miloš Lukić.
Nëse do të ketë zgjedhje në Republikën Srpska varet nga reagimi i opozitës
Pas seancës së komitetit kryesor të partisë, SNSD i propozoi opozitës në Republika Srpska të formojë një "qeveri të unitetit kombëtar". Nëse do të ketë kandidatë në ato zgjedhje në Republikën Srpska, të cilat përfundimisht do të shpallen nga KQZ-ja e BiH-së, kjo varet nga përgjigja e opozitës. Në Sarajevë, ata paralajmërojnë se pengimi i mbajtjes së zgjedhjeve është një akt kriminal.
Nga ana tjetër, mbrojtja e Dodik njoftoi se do të kërkojë shtyrje të ekzekutimit të vendimit, për të bërë apelim në Gjykatën Kushtetuese të Bosnjës dhe Hercegovinës./ZËRI
