FRANCË - Gjashtë adoleshentë francezë të akuzuar për bashkëpunim, në vrasjen e një mësuesi, do të dalin sot në gjyq. Adoleshentët ishin të moshës nga 13 deri në 15 vjeç në kohën e vrasjes së Samuel Patit në vitin 2020, nga ana e një refugjati çeçen.
Të dyshuarit akuzohen se kanë bashkëpunuar me vrasësin çeçen, që ky i fundit të kryente krimin. Ata përballen me një maksimum prej 2.5 vjet burg. Paty u ther me thikë dhe iu pre koka më 16 tetor 2020, pasi thuhet se u tregoi studentëve karikatura të Profetit Muhamed, kur po diskutohej liria e shprehjes.
E dyshuara më e re ishte 13 vjeçe në kohën e vrasjes. Ajo ka deklaruar se mësuesi iu ka thënë studentëve myslimanë, që të largohen nga klasa. Ajo në fakt kishte munguar në klasë atë ditë. Megjithatë, babai i saj postoi video në mediat sociale, duke bërë thirrje që mësuesi Paty të pushohej nga puna. Prokurorët besojnë se këto video e shtynë çeçenin 18-vjeçar Abdoullah Anzorov të udhëtonte rreth 80 km (50 milje) nga Normandia në Conflans-Sainte-Honorine, afër Parisit, për të kryer vrasjen.
Pesë të dyshuarit e tjerë në këtë rast supozohet se e kanë ndihmuar Anzorovin të identifikojë zotin Paty në shkollë në këmbim të një pagese prej 300 € (260 £). Njëri tha se Anzorov i tha atij se donte të filmonte Patyn duke kërkuar falje për shfaqjen e karikaturave të profetit Muhamed.
Një gjyq i dytë do të hapet vitin e ardhshëm për tetë të rritur, të akuzuar gjithashtu për bashkëpunim në vrasje. Këtu përfshihet Brahim Chnina, babai i vajzës 13-vjeçare, e cila ndodhet në gjyq. Prokurorët kanë akuzuar dy miqtë e Anzorov si bashkëpunëtor në një vrasje terroriste. Një burrë akuzohet se e shoqëroi Anzorovin për të blerë armë, tjetri se e kishte çuar në shkollën ku zoti Paty jepte mësim ditën e vrasjes./BBC - Zëri.ai/
