IZRAEL- Pavarësisht thirrjeve të vazhdueshme nga SHBA dhe Evropa që Izraeli të shmangë pushtimin e Rafahut, ku janë përqendruar mijëra palestinezë të zhvendosur, Benjamin Netanyahu ka shprehur edhe një herë vendosmërinë e tij për të urdhëruar një lëvizje të tillë. Gjatë fjalës së tij, kryeministri izraelit theksoi se shteti i tij do ta fitojë luftën në Gaza "pa marrë parasysh çfarë" dhe se për ta bërë këtë duhet të ndërmerren veprime edhe në Rafah në jug të Rripit të Gazës.
Sipas tij, “për të fituar këtë luftë ne duhet të shkatërrojmë brigadat e mbetura terroriste të Hamasit në Rafah. Miqve tanë në komunitetin ndërkombëtar, unë u them se është e pamundur të mbështesim të drejtën e Izraelit për të mbrojtur veten dhe më pas të kundërshtojmë Izraelin kur ai e ushtron këtë të drejtë”.
“Nuk është e mundur të thuash se mbështesni qëllimin e Izraelit për të shkatërruar Hamasin dhe më pas të kundërshtoni Izraelin kur ai merr hapat e nevojshëm për të arritur këtë qëllim”, shtoi kryeministri izraelit.
Netanyahu theksoi gjithashtu se nuk është e mundur "të kundërshtohet strategjia e Hamasit për përdorimin e civilëve si mburoja njerëzore dhe më pas të fajësohet Izraeli për viktimat civile që rezultojnë nga kjo strategji. Fitorja jonë është afër. E di që shumica e popullit amerikan është me ne”./ZËRI
