SHBA- Ankthi i komunitetit ndërkombëtar për zhvillimet në Lindjen e Mesme me ekuacionin e luftës që po merr faktorë të tjerë është i dukshëm. Shtetet e Bashkuara po dërgojnë përforcime në rajonin e Lindjes së Mesme pasi frika rritet për një sulm të mundshëm iranian ndaj Izraelit, të cilin Teherani e fajëson për sulmin vdekjeprurës në konsullatën iraniane në Damask.
"Ne po vendosim shtesa brenda rajonit për të rritur përpjekjet rajonale të parandalimit dhe për të rritur mbrojtjen e forcave amerikane," tha një zyrtar i mbrojtjes amerikane.
Më herët, zëdhënësi i Shtëpisë së Bardhë, John Kirby tha se "kërcënimet e Iranit për të sulmuar Izraelin janë të besueshme dhe reale", por nuk dha hollësi për kohën ose objektivat e një sulmi të tillë. Siç tha ai, Joe Biden "është informuar në mënyrë të përsëritur nga ekipi i sigurisë kombëtare dhe SHBA synon të bëjë gjithçka që është e mundur për të siguruar që Izraeli të mund të mbrohet".
Ndërkohë vetë presidenti i SHBA-së, Joe Biden i dha një mesazh të qartë Iranit, i cili ka kërcënuar se do të ndërmarrë veprime ushtarake kundër Izraelit, thjesht me një “mos”.
Netanyahu po përgatit një "Këshill të Luftës".
Kryeministri izraelit Benjamin Netanyahu do të takohet me anëtarët e kabinetit të luftës të Izraelit, duke përfshirë ministrin e Mbrojtjes Yoav Gallad dhe liderin e opozitës Benny Gantz, sipas BBC. Izraeli është vënë në gatishmëri të lartë, nën kërcënimin e një sulmi të mundshëm iranian. Sipas asaj që raporton rrjeti amerikan CBS News, duke cituar zyrtarë amerikanë, Irani mund të sulmojë duke përdorur më shumë se 100 dronë, dhjetëra raketa lundrimi dhe ndoshta raketa balistike kundër objektivave ushtarake në Izrael.
Në të njëjtën kohë, në një klimë të tillë tensionesh të shtuara dhe nën frikën e sulmeve të kërcënuara, vende si SHBA, Britania e Madhe, India, Australia, paralajmëruan qytetarët e tyre që të mos udhëtojnë në Izrael dhe Iran gjatë kësaj periudhe. Vihet re se Teherani ka deklaruar se do të hakmerret për goditjen e marrë nga konsullata e tij në Damask të Sirisë më 1 prill. Sulmi vrau 16 persona, duke përfshirë shtatë anëtarë të Gardës Revolucionare, një organ elitar i forcave të armatosura të Republikës Islamike, sipas OJQ-ve.
Sipas BBC, mundësia e një sulmi iranian ka shkaktuar shqetësim në Izrael. Megjithatë, qeveria nuk ka dhënë asnjë këshillë për qytetarët përtej udhëzimeve ekzistuese për të rezervuar ujë, ushqim për tre ditë dhe ilaçe bazë./ZËRI
