SHBA- Qindra mijëra qytetarë amerikanë po protestojnë nën sloganin “Nuk ka mbretër”, duke kundërshtuar politikat e presidentit Donald Trump mbi çështjet ekonomike dhe luftën e nisur nga Shtetet e Bashkuara ndaj Iranit. Më shumë se 3 mijë tubime u mbajtën në 50 shtetet amerikane, ku protestat më të mëdha u zhvilluan në qytete si New York City, Dallas, Philadelphia dhe Washington.
Një nga tubimet kryesore u mbajt në St. Paul, ku mijëra persona u mblodhën pranë Kapitolit të shtetit në Minesota. Protestuesit mbanin pankarta me fotografitë e dy qytetarëve amerikanë, të vrarë nga agjentë federalë të emigracionit (ICE) në fillim të këtij viti, duke i kthyer ngjarjet në simbol të pakënaqësisë ndaj politikave të emigracionit.
Në New York City, dhjetëra mijëra protestues mbushën rrugët e Manhattan-it, ndërsa aktori Robert De Niro, një nga organizatorët, paralajmëroi për rrezikun që, sipas tij, paraqet presidenca e Trump për liritë dhe sigurinë. Ndërkohë, në Washington, D.C., protestuesit u mblodhën në National Mall, duke brohoritur slogane në mbështetje të demokracisë dhe kundër presidentit.
Protestat u shoqëruan edhe me incidente. Në Los Angeles, dy persona u arrestuan pasi sulmuan agjentë federalë pranë një ndërtese qeveritare, ndërsa policia përdori gaz lotsjellës për të shpërndarë turmat. Arrestime pati edhe në Dallas pas përplasjeve të vogla mes protestuesve dhe kundërprotestuesve.
Organizatorët deklaruan se protestat ishin një reagim ndaj politikave të presidentit, përfshirë përfshirjen në luftën me Iranin, zbatimin e rreptë të ligjeve federale të emigracionit dhe rritjen e kostos së jetesës. Në një deklaratë të tyre, ata akuzuan Trump se po përpiqet të qeverisë në mënyrë autoritare, duke theksuar se “pushteti i takon popullit dhe jo ‘mbretërve të mundshëm’ apo aleatëve të tyre miliarderë”.
Nga ana tjetër, një zëdhënës i Shtëpisë së Bardhë i quajti protestat “seanca terapie për urrejtjen ndaj Trump” dhe minimizoi rëndësinë e tyre, duke thënë se ato interesojnë vetëm mediat. Ndërkohë, Donald Trump po përballet me një rënie të mbështetjes nga qytetarët amerikanë, sipas një sondazhi të fundit nga Ipsos. Protestat masive në të gjithë Shtetet e Bashkuara vijnë në prag të zgjedhjeve afatmesme të nëntorit, të cilat pritet të përcaktojnë përbërjen e re të Kongresit amerikan./ZËRI
