KOSOVË- Serbët e zhvendosur nga Kosova kanë paralajmëruar bllokimin e rrugës dhe kalimit të makinave të shqiptarëve, që vijnë nga vendkalimi Merdar drejt Kurshumlisë, Nishit dhe Beogradit, në drejtim të Suboticës.
Sipas njoftimit, nga ora 12:00 deri në orën 15:00 do të bllokohet qarkullimi i automjeteve që drejtohen nga shqiptarët përmes vendkalimit Merdarë drejt Kurshumlisë, Nishit dhe Beogradit dhe më tej në drejtim të Suboticës, përfshirë kufirin me Hungarinë.
“Bllokimi i rrugës do të jetë çdo të hënë nga tri orë përkatësisht nga ora 12.00 deri në ora 15.00 dhe atë deri në ndalimin e terrorit të përditshëm ndaj popullit tonë në Kosovë. Terrori që ata përjetojnë serbët dhe jo-shqiptarët është bërë i padurueshëm dhe shumë afër është edhe konflikti me pasoja të paparashikueshme“, thuhet në deklaratën e Shoqatës të Personave të Zhvendosur serb, të tubuar në këshillin iniciues të serbëve të Podujevës në Kosovë.
Ata kërkojnë nga presidenti Aleksandër Vuçiç dhe ministri i Jashtëm Ivica Daçiç, por edhe anëtarë të tjerë të Qeverisë së Serbisë, që urgjentisht të ankohen tek ndërkombëtarët, për atë që e quajnë “presion dhe terror mbi serbët e Kosovës”./ZËRI/
