UASHINGTON - Shtëpia e Bardhë tha të martën se inteligjenca e saj kishte informacione se Hamasi po përdorte spitalin më të madh të Gazës, Al Shifa për të drejtuar operacionet e saj ushtarake dhe ndoshta për të ruajtur armët, duke thënë se këto veprime përbënin një krim lufte.
"Ne kemi informacione që konfirmojnë se Hamasi po përdor atë spital të veçantë për një mënyrë komandimi dhe kontrolli dhe ndoshta për të ruajtur armët”, u tha gazetarëve në bordin e Air Force One, zëdhënësi i sigurisë kombëtare John Kirby. "Ky veprim është një krim lufte", shtoi ai.
Kirby tha se Shtetet e Bashkuara kishin informacione se Hamasi dhe Xhihadi Islamik Palestinez po përdornin disa spitale në Rripin e Gazës, duke përfshirë Al Shifan, për të fshehur ose mbështetur operacionet e tyre ushtarake dhe për të mbajtur pengje.
Ai tha se grupet ishin gjithashtu të përgatitura për t'iu përgjigjur operacioneve ushtarake izraelite kundër objektit spitalor.
Ky informacion erdhi nga një sërë metodash inteligjence, tha ai, duke shtuar se administrata Biden kishte ulur nivelin e klasifikimit të disa prej të dhënave të martën, në mënyrë që të mund të ndajë konkluzionet e saj me gazetarët.
Kirby nënvizoi se veprimet e Hamasit në spitale nuk e pakësuan përgjegjësinë e Izraelit për të mbrojtur civilët, por pranoi se i bëri përpjekjet e Izraelit për të çrrënjosur Hamasin, më të komplikuara.
"Për të qenë të qartë, ne nuk mbështesim goditjen e një spitali nga ajri. Ne nuk duam të shohim një përplasje zjarri në një spital ku njerëz të pafajshëm, njerëz të pafuqishëm, njerëz të sëmurë thjesht po përpiqen të marrin kujdesin mjekësor që meritojnë," tha Kirby.
Hamasi sulmoi Izraelin, ndërsa ushtria izraelite ka hyrë tashmë në Gaza. Më tepër se 12500 njerëz kanë vdekur nga sulmet e të dyja palëve./Zëri.ai/
