BRITANI E MADHE- Aktori Sir Michael Gambon ka ndërruar jetë në moshën 82-vjeçare. Ai ishte më i njohur për rolin e profesorit Albus Dumbledore në 6 nga 8 filmat e Harry Potter. Ylli i lindur në Dublin ka punuar në TV, film, teatër dhe radio gjatë karrierës së tij, gjatë së cilës fitoi 4 Bafta.
E veja e tij Lady Gambon dhe djali Fergus thanë se "burri dhe babai i tyre i dashur" ndërroi jetë në paqe në spital me familjen pranë tij. Familja e Sir Michael ishte zhvendosur në Londër kur ai ishte fëmijë, por ai bëri shfaqjen e tij të parë skenike në Irlandë, në një produksion të Othello në Dublin në 1962.
Karriera e tij mori hov kur u bë një nga anëtarët e kompanisë së aktrimit të Teatrit Kombëtar të Laurence Olivier në Londër. Ai fitoi tre çmime Olivier për shfaqjet në produksionet e Teatrit Kombëtar. Ai u nominua për çmimet Emmy për rolin e tij si Mr.Woodhouse në një adaptim të "Ema" të Jane Austen në 2010, dhe për rolin e Presidentit Lyndon B Johnson në "Path to War" në 2002.
Ai u shpall kalorës (titulli SIR) për shërbimet në industrinë e argëtimit në vitin 1998. Edhe pse i lindur në Irlandë, ai ishte bërë shtetas britanik në fëmijërinë e tij. Aktori, i njohur si "The Great Gambon" në qarqet e aktrimit, ishte shfaqur për herë të fundit në skenë në vitin 2012 në një prodhim në Londër të shfaqjes së Samuel Beckett "All That Fall"./Zëri.ai
