GJERMANI- Moti i keq ka përfshirë Gjermaninë, duke çuar në tre viktima dhe duke shkaktuar ndërprerje të konsiderueshme në transportin publik. Moti i ftohtë dhe ngricat në Gjermani janë shkaktarë të aksidenteve të shumta në të cilat vetëm sot kanë humbur jetën tre persona.
Një autobus shkolle u përplas me një automjet të mirëmbajtjes së rrugës, duke dalë nga rruga dhe duke u përplasur me një pemë. Nga aksidenti mbeti i vdekur një student, ndërsa dhjetë fëmijë të tjerë dhe dy të rritur, mes të cilëve edhe shoferi i autobusit mbetën të plagosur.
Përveç tragjedisë së autobusit të shkollës, moti i ashpër shkaktoi edhe dy viktima të tjera në autostradën A8 në Bavarinë e Epërme, kur një makinë rrëshqiti dhe u përplas me një kamion të ndaluar. Reshjet e dendura të borës kanë shkaktuar ndërprerje të mëdha në transportin ajror, rrugor dhe hekurudhor.
Dëbora ka arritur një lartësi rekord për muajin dhjetor në Mynih, duke shkaktuar probleme të shumta edhe në transportin rrugor dhe hekurudhor. Reshjet e borës deri në gjysmë metri në Bavari, Gjermania jugore, çuan në anulimin e shumë trenave, me sistemet e sinjalizimit dhe tabelat elektronike të informacionit që shpesh keq-funksiononin. Në të gjithë vendin, pasagjerët hekurudhor dhe rrugor u këshilluan të anulonin çdo udhëtim të panevojshëm në mes të kaosit.
