EKUADOR- Gjashtë autorët e dyshuar për përfshirje në vrasjen e kandidatit presidencial kundër korrupsionit të Ekuadorit, Fernando Villavicencio, janë vrarë në burg, ka thënë agjencia e burgjeve, vetëm një javë para balotazhit përfundimtar.
Vrasjet ndodhën të premten në një burg në Guayaquil, qyteti më i madh i vendit të Amerikës së Jugut, njoftoi më herët zyra e Prokurorit të Përgjithshëm. Qeveria e Ekuadorit dënoi ngjarjen. Presidenti në largim Guillermo Lasso u zotua se do i shkojë deri në fund ngjarjes.
Agjencia e burgjeve SNAI tha në një deklaratë se gjashtë viktimat ishin të gjithë shtetas kolumbianë. Ai nuk dha më shumë detaje për vrasjet.
Qeveria ka thënë se autoritetet janë të vendosura për të identifikuar ata që qëndrojnë pas vrasjes së Villavicencio. Villavicencio, një gazetar i shquar, u qëllua për vdekje më pak se dy javë përpara një raundi të parë të zgjedhjeve të përgjithshme, teksa largohej nga një tubim i fushatës në kryeqytetin, Quito.
Policia arrestoi gjashtë kolumbianët në ditën e vrasjes së Villavicencio. Një i dyshuar i shtatë, gjithashtu kolumbian, u qëllua dhe u vra nga policia, ndërsa të dyshuarit e tjerë u arrestuan më vonë. Raundi i dytë i balotazhit është planifikuar për në 15 tetor, kulmi i një cikli zgjedhor të dëmtuar nga incidente të shumta dhune.
Trashëgimtari i biznesit Daniel Noboa, i cili mban një epërsi të ngushtë në disa sondazhe përpara balotazhit, tha në një postim në mediat sociale se qeveria duhet të japë detaje të asaj që ndodhi në burg dhe se paqja duhet të rivendoset në vend.
Rivalja e tij kryesore për presidencën është Luisa Gonzalez, një e mbrojtur e ish-presidentit të majtë Rafael Correa. Ajo ka thënë se rritja e krimit është e paprecedentë dhe se votuesit nuk duhet të lejojnë "terrorin" që t'i ndalojë ata të votojnë për ndryshim./Zëri.ai
