TIRANË- Kryeministri i Kosovës Albin Kurti dhe Presidenti i Serbisë Aleksandër Vuçiç pritet të takohen në Bruksel të enjten e 26 tetorit. Kjo nuk është konfirmuar ende nga asnjë prej qeverive por gjasat janë që të dy liderët të jenë në Bruksel më 26 tetor.
“Plani është që katër liderët, presidenti i Francës, Emmanuel Macron, kryeministrja e Italisë, Giorgia Meloni, kancelari i Gjermanisë, Olaf Scholz, dhe përfaqësuesi i lartë i BE-së Josep Borrell, të kenë takim të përbashkët me kryeministrin e Kosovës, Albin Kurti, në margjinat e samitit të BE-së të enjten”, shkruan REL referuar burimeve në Bruksel.
Takim I të njëjtit format pritet të zhvillohet edhe me presidentin serb, Aleksandar Vuçiç.
Marrëdhëniet mes dy vendeve janë tensionuar që pas sulmit terrorist të 24 shtatorit, ku mbeti i vrarë efektivi i Policisë së Kosovës Afrim Bunjaku dhe u plagosën dy kolegët e tij. Prishtina zyrtare akuzon Beogradin për sulmin ndërsa ky i fundit mohon të ketë lidhje.
Si organizator i sulmit është Millan Radoiçiç, ish-nënkryetari i Listës Serbe dhe një mik i presidentit Vuçiç. Radoiçiç e ka pranuar por mohon që ushtria apo forcat e sigurisë serbe të kenë gisht në sulm.
Më 21 tetor në Prishtinë e Beograd zbarkuan emisarët e dialogut të BE-së dhe SHBA-së së bashku me zyrtarë të lartë nga Franca, Emanuel Bonne, Gjermania, Jens Plotner dhe Italia, Alessandro Cattaneo. Palët duket se janë ende larg arritjes së marrëveshjes./Zëri.ai
