SHBA- Shtëpia e Bardhë ka hedhur poshtë dhe e ka quajtur të pavërtetë një projekt-memorandum të publikuar nga media shtetërore iraniane të mërkurën, duke shënuar përplasjen më të fundit midis Uashingtonit dhe Teheranit mbi negociatat e paqes.
“Ky raport nga media e kontrolluar nga Irani nuk është i vërtetë dhe Memorandumi i Mirëkuptimit që ata ‘publikuan’ është një trillim i plotë. Askush nuk duhet ta besojë atë që po publikon media shtetërore iraniane. FAKTET KANË RËNDËSI”, shkruhej në një postim Shtëpisë së Bardhë në X.
Reuters raportoi të mërkurën se televizioni shtetëror iranian siguroi një draft të memorandumit jozyrtar, në të cilin SHBA-të do të hiqnin bllokadën detare ndaj porteve iraniane dhe do të tërhiqnin trupat nga Irani, ndërsa kombi persian do të rikthente transportin tregtar përmes Ngushticës së Hormuzit në nivelet e para luftës brenda një muaji.
Shenjat e një marrëveshjeje të mundshme midis të dyja palëve u shfaqën të shtunën kur Trump konfirmoi se foli me një numër udhëheqësish të Lindjes së Mesme dhe tha se aspektet përfundimtare të marrëveshjes do të shpallen “së shpejti”.
Një zyrtar i lartë i administratës tha më vonë të dielën se memorandumi i mirëkuptimit i jep SHBA-së 60 ditë për të arritur një marrëveshje përfundimtare dhe i angazhoi iranianët që “të heqin dorë nga pluhuri bërthamor”.
Megjithatë, të hënën në mbrëmje, SHBA-të nisën sulme në Iranin jugor, në ato që i quajtën sulme mbrojtëse që nuk do të ndryshonin rrjedhën e negociatave.
Sekretari i Shtetit, Marco Rubio, tha të martën se një marrëveshje e mundshme për t'i dhënë fund luftës mund të "zgjatë disa ditë".
“Sot në Katar u zhvilluan disa bisedime, kështu që do të shohim nëse mund të bëjmë përparim. Mendoj se po diskutohet shumë për gjuhën specifike në dokumentin fillestar, kështu që do të duhen disa ditë”, tha Rubio.
Ai vuri në dukje se Trump "ose do të bëjë një marrëveshje të mirë ose asnjë marrëveshje", duke shtuar se Ngushtica e Hormuzit, një kalim jetësor në rajon, duhet të rihapet.
Megjithatë, ende nuk është arritur asnjë marrëveshje publike.
Shtëpia e Bardhë theksoi se qëndrimi zyrtar i SHBA mbetet i pandryshuar dhe se çdo marrëveshje e mundshme do të duhet të kalojë përmes procesit diplomatik dhe miratimeve ndërkombëtare./ZËRI
