NAPOLI- Një shqiptar është arrestuar në Napoli, në Itali, pasi u kap me 11 kilogramë kokainë të fshehur në makinë, nga një operacion i policisë italiane.
Operacioni i Guardia Di Financa u zhvillua në zonën e Napolit, ku u sekuestrua një sasi kokaine, gati për t’u shitur, me vlerë 1 milion euro.
Sipas Ansa, operacioni i arrestimit të dyshuarit, bëri të mundur çmontimin e një hallke të rëndësishme në zinxhirin e furnizimit të organizatave kriminale që operojnë në zonën napolitane. Sekuestrimi i kësaj sasie të madhe droge përbën një goditje të rëndë për arkën e Camorrës, duke e privuar atë nga një burim i rëndësishëm financimi, shkruajnë mediat italiane.
Sipas autoriteteve, arrestimi i shqiptarit hap rrugë të reja hetimore që mund të çojnë në identifikimin e subjekteve të tjera të përfshira në trafikun e paligjshëm dhe të çmontojnë qeliza të tëra kriminale. /ZËRI/
