“Volodymyr, ti nuk je vetëm”, reagimi i Evropës pas përplasjes me Donald Trump
EUROPË- Njëri pas tjetrit, liderët perëndimorë janë në anën e presidentit ukrainas Volodymyr Zelenskyy, pas takimit plot ngjarje në Shtëpinë e Bardhë me Presidentin e SHBA, Donald Trump. Mesazhi që ata po dërgojnë është se vendet e tyre do të vazhdojnë të mbështesin presidentin e Ukrainës, si dhe popullin e saj. I pari që reagoi ishte presidenti francez Emmanuel Macron, i cili theksoi se Rusia është vendi agresor.
"Ne duhet të respektojmë ata që kanë luftuar që nga fillimi,"- u tha ai gazetarëve në periferi të vizitës së tij në Portugali.
Kryeministri polak Donald Tusk në mesazhin e tij të shkurtër thotë se populli ukrainas nuk është i vetëm.
“I dashur Zelensky, të dashur miq ukrainas, ju nuk jeni vetëm”.
Spanja është në të njëjtën gjatësi vale, me kryeministrin Pedro Sanchez që shkruan në një postim tregjuhësh se "Spanja qëndron me ju".
Mbështetja e Presidentit të Estonisë, Zitanas Nausea është e frymëzuar nga futbolli: Ukrainë, nuk do të ecësh kurrë vetëm, shkroi ai, duke perifrazuar himnin e Liverpool-it.
REAGIME TË TJERA
Kryeministri norvegjez Jonas Gahr Støre është lideri i fundit evropian që ofron mbështetjen e tij për Zelenskyy dhe Ukrainën, pasi ai thotë këtë: Ne qëndrojmë pranë Ukrainës në luftën e saj të drejtë për një paqe të drejtë dhe të qëndrueshme.
Kryeministri suedez Ulf Kristersson tha: Suedia qëndron me Ukrainën. Ju nuk po luftoni vetëm për lirinë tuaj, por edhe për të gjithë Evropën. Slava Ukraina!
Presidentja e Komisionit Evropian Ursula von der Leyen dhe presidenti i Këshillit Evropian Antonio Costa postuan të njëjtin përditësim në llogaritë e tyre në mediat sociale vetëm tani, duke thënë: Dinjiteti juaj nderon trimërinë e popullit ukrainas. Ji i fortë, trim, ji i patrembur. Ju nuk jeni kurrë vetëm, i dashur President @ZelenskyyUa. Ne do të vazhdojmë të punojmë me ju për një paqe të drejtë dhe të qëndrueshme.
Kancelari gjerman në largim Olaf Scholz tha: Askush nuk dëshiron paqe më shumë se qytetarët e Ukrainës! Kjo është arsyeja pse ne po punojmë së bashku për të gjetur një mënyrë për një paqe të qëndrueshme dhe të drejtë. Ukraina mund të mbështetet te Gjermania – dhe te Evropa.
Reagimi i Rusisë
Ndërkohë, në Rusi është evidente kënaqësia me atë që ndodhi në Uashington. Dmitry Medvedev, ish-presidenti rus në reagimin e tij, e krahasoi presidentin ukrainas me një derr.
"Derri i pafytyrë më në fund mori një shuplakë në Zyrën Ovale. Dhe Donald Trump ka të drejtë: regjimi i Kievit po luan kumar me Luftën e Tretë Botërore,"-shkruan ai. Po ashtu, edhe zëdhënësja për shtyp e Ministrisë së Jashtme ruse, Maria Zakharova, ka lëshuar një deklaratë në emër të diplomacisë ruse.
“Mënyra se si Trump dhe Vance u përmbajtën dhe nuk e goditën Zelenskyy-n është një mrekulli e vetëpërmbajtjes,”- shkroi Zakharova pas takimit./ZËRI
BBC zbulon detaje: Rubio dhe Waltz "përzunë" Zelenskyy-n nga Shtëpia e Bardhë
SHBA- Zbulohen detaje të tjera nga "përzënia" e presidentit Volodymir Zelenskyy nga Shtëpia e Bardhë. Nga burimet e BBC është mësuar se pas takimit në Zyrën Ovale, delegacioni ukrainas u dërgua në një dhomë të ndarë. Më pas, atje shkuan, këshilltari për sigurinë kombëtare, Mike Waltz dhe sekretari i shtetit Marco Rubio. Ishin këta të dy që i kërkuan presidentit ukrainas që të largohej nga Shtëpia e Bardhë.
Kështu u anulua edhe konferenca për shtyp që ishte paralajmëruar.
Madje nuk u nënshkrua as marrëveshja për mineralet e rralla. Pas takimit, në një deklaratë zyrtare nga "Shtëpia e Bardhë" shkruhej se Trump dhe zëvendëspresidenti JD Vance nuk do të lejojnë kurrë që të përfitohej prej popullit amerikan.
"Dyshja do të qëndrojë gjithmonë në mbrojtje të interesave të popullit amerikan dhe atyre që respektojnë pozicionin e Shteteve të Bashkuara në botë."
Në këto kushte, natyrisht që dalja e Zelenskyy-t nga Shtëpia e Bardhë ishte e nxituar dhe me pak ceremoni. Kamera e ekipit televiziv e ka kapur duke dalë nga godina i shoqëruar vetëm nga një zonjë që merret me protokollin.
Ai e përshëndeti me nxitim dhe pothuajse pa e parë dhe hipi në makinë. Anëtarët e tjerë të delegacionit u futën me shpejtësi në makinat e tyre dhe u nisën drejt aeroportit. Si pjesë e vizitës së tij në Uashington DC, presidenti ukrainas Volodymyr Zelenskyy do të fliste sonte në Institutin konservator Hudson, gjithmonë pas takimit me Trump.
Por edhe ky takim iu anulua./ZËRI
Tensione dhe përplasje me Trump/ Zelenskyy ironik pas largimit nga Shtëpia e Bardhë: Faleminderit!
SHBA- Presidenti ukrainas Volodymyr Zelenskyy ka bërë reagimin e tij të parë pas takimit me Donald Trump. Në rrjet social në "X", Zelenskyy ironizoi duke shprehur shumë herë falenderime. Kjo sepse si Trump, edhe zëvendëspresidenti i tij, J.D. Vance iu drejtuan presidentit ukrainas që të tregohej më falenderues ndaj tyre.
Zelenskyy: Faleminderit Amerikë, faleminderit për mbështetjen tuaj, faleminderit për këtë vizitë. Faleminderit president, Kongres dhe popull amerikan. Ukraina ka nevojë për paqe të drejtë dhe të qëndrueshme, dhe ne po punojmë pikërisht për këtë.
Çfarë i tha Vance dhe Trump?
Takimi më pas mori një kthesë të papritur, pasi Trump i tha Zelenskyy-t në një moment se ai duhet "të jetë mirënjohës", madje dhe e akuzoi se po luan bixhoz me Luftën e Tretë Botërore. Në raportimet e mediave të huaja pretendohet se këtu ka ndërhyrë edhe zëvendëspresidenti JD Vance, i cili akuzoi Volodymyr Zelenskyy-n.
“A keni thënë faleminderit një herë të vetme?,”- e pyeti ai. Teksa presidenti ukrainas kthen përgjigje, ndërhyn sërish JD Vance dhe e akuzon se nuk e ka falenderuar për mbështetjen, pavarësisht falënderimeve të përsëritura nga Zelenskyy ndër vite për të gjithë vendet që e kanë ndihmuar Ukrainën./ZËRI
Përplasja e ashpër Trump-Zelenskyy, vjen reagimi i parë nga Rusia
SHBA- Një këshilltar i presidentit rus Vladimir Putin reagoi ndaj videos së shkëmbimit të nxehtë të diskutimeve në Zyrën Ovale midis presidentit ukrainas Volodymyr Zelenskyy dhe atij amerikan, Donald Trump. Kirill Dmitriev i komentoi diskutimet vetëm me një fjalë.
"Historike,"- shkroi Kirill Dmitriev në X .
Dmitriev është CEO i Fondit të Investimeve Direkte Ruse dhe mori pjesë në diskutimet e fundit midis SHBA-së dhe Rusisë në Arabinë Saudite./ZËRI
Tone të ashpra, ofendime dhe ultimatume! PRAPASKENAT-Ja çfarë ndodhi në takimin Trump-Zelenskyy
SHBA- Zbardhen detaje nga takimi i presidentit të SHBA-ve, Donald Trump dhe homologut të tij ukrainas, Volodymir Zelenskyy. Sipas raportimeve të "The Guardian", presidenti i SHBA ka vlerësuar trupat ukrainase duke i cilësuar si "të guximshme", madje shtoi se u dha një meritë të madhe për qëndresën që i kanë bërë agresionit rus për 3 vjet.
Më tej, shtoi se marrëveshja për mineralet duhet të nënshkruhet duke shtuar se Amerika kërkon të përdorë materiale të tokës së ukrainës, në këmbëim të ndihmës që i ka dhënë përgjatë 3 viteve. Për më tepër shton se, "aty ku ka amerikanë, nuk ka luftë". Sipas Trump, ky është thelbi i marrëveshjes. Por Zelenskyy ka mbajtur një qëndrim të tërhequr duke i kërkuar Trump që të mos bëjë kompromis me një vrasës, duke iu referuar presidentit rus Vladimir Putin. Trump iu përgjigj duke i thënë se ka të njëjtat ndjeshmëri si për Putin, ashtu edhe për Ukrainën.
“Unë nuk jam në linjë me askënd. Unë jam në linjë me Shtetet e Bashkuara të Amerikës dhe të mirën e botës. Përndryshe nuk do të arrijmë kurrë një marrëveshje. Ndaj nuk dua të them gjëra të tmerrshme për Putin,"-tha Trump.
Trump dhe Zelenskyy nuk pajtohen për shkallën e ndihmës së Evropës
Dyshja diskutoi gjithashtu ndihmën e Evropës për Ukrainën në një shkëmbim që tregon disa dallime midis tyre:
Zelenskyy: Me të vërtetë, ne mund ta ndihmojmë Evropën, sepse Evropa me të vërtetë na ndihmoi… Presidenti Trump tha se ata [ofruan] më pak mbështetje, por ata janë miq dhe partnerë shumë mbështetës… Ata me të vërtetë dhanë shumë, zoti President.
Trump: Vërtet? Ndoshta e bënë, por dhanë shumë më pak.
Zelenskyy: Jo.
Trump: Shumë më pak.
Zelenskyy: Jo.
Trump: … më pak…
Zelenskyy: Jo.
Trump: Në rregull!
Por takimi më pas mori një kthesë të papritur, pasi Trump i tha Zelenskyy-t në një moment se ai duhet "të jetë mirënjohës", madje dhe e akuzoi se po luan bixhoz me Luftën e Tretë Botërore. Në raportimet e mediave të huaja pretendohet se këtu ka ndërhyrë edhe zëvendëspresidenti JD Vance, i cili akuzoi Volodymyr Zelenskyy-n.
“A keni thënë faleminderit një herë?,”- e pyeti ai.
Në një moment të takimit të tyre, JD Vance tha se negociatat ishin të nevojshme, por Zelenskyy nuk ishte i kënaqur, duke u përgjigjur se Putini theu vazhdimisht marrëveshjet e mëparshme.
"Pra, për çfarë lloj diplomacie po më flisni?,"-mësohet se i ka thënë presidenti ukrainas.
Zelenskyy tha se Putini theu armëpushimet dhe marrëveshjet me vendet e tjera 25 herë. Ai paralajmëroi vazhdimisht se çdo marrëveshje pa garanci sigurie nuk do të mjaftonte.
"Putini nuk do të ndalet kurrë dhe do të shkojë gjithnjë e më tej. Ai na urren. Nuk ka të bëjë me mua. Ai i urren ukrainasit. Ai mendon se ne nuk jemi komb. Mendoj ndoshta edhe me ekipin tuaj, nuk e di, por me të gjithë evropianët në media, zyrtarisht dhe jo, gjithmonë thoshte se nuk ka një vend të tillë, një komb të tillë, një gjuhë të tillë dhe një jetë të tillë si ukrainishtja."
Kjo bëri që Vance të shpërthejë, duke akuzuar Zelenskyy-n se e kishte disrespektuar, ndaj në këtë pikë ndërhyri Trump: Mos na thuaj se çfarë do të ndjejmë. Ju nuk jeni në gjendje të diktoni se çfarë do të ndiejmë ne... Ju e keni lejuar veten të jeni në një pozitë shumë të keqe. Nuk e keni avantazhin tani të vendosni kushte. Ju po luani kumar me jetët e miliona njerëzve, po luani me Luftën e Tretë Botërore. Dhe kjo që po bëni tregon shumë mosrespekt ndaj këtij vendi.
Në këtë moment, ndërhyn sërish JD Vance dhe e akuzon se nuk e ka falenderuar për mbështetjen, pavarësisht falënderimeve të përsëritura nga Zelenskyy ndër vite për të gjithë vendet që e kanë ndihmuar Ukrainën. Këtu ka nisur një diskutim i ri që ka bërë Trump të ngrejë zërin, duke e bërë Zelenskyy t'i përgjigjet kështu:
"A mendoni se nëse do të flisni me zë të lartë keni të drejtë?"
Zelenskyy iu përgjigj gjithashtu komenteve të përsëritura të Trump për njerëzit që vdesin në luftë, duke thënë: Presidenti flet për njerëzit dhe ushtarët që po vdesin, por ata erdhën në territorin tonë. Ata erdhën në tokën tonë. Ata filluan këtë luftë dhe duhet të ndalojnë.
Trump u pyet gjithashtu për kompromise, dhe ai tha: Unë mendoj se ju do të duhet të bëni gjithmonë kompromise. Ju nuk mund të bëni asnjë marrëveshje pa kompromise. Pra, sigurisht që atij do t'i duhet të bëjë disa kompromise, por shpresojmë se ato nuk do të jenë aq të mëdha sa disa njerëz mendojnë se ato që ju do të duhet të bëni. Pra, kjo është gjithçka që mund të bëjmë. Unë jam këtu si arbitër, si ndërmjetës, në një masë të caktuar, mes dy palëve që kanë qenë shumë armiqësore.
Në fund të takimit të nxehtë, Trump e mbyll me këto fjalë: Problemi është se unë ju kam fuqizuar të jeni një djalë i ashpër dhe nuk mendoj se do të ishit një djalë i ashpër pa Shtetet e Bashkuara. Dhe njerëzit tuaj janë shumë të guximshëm. Por ju ose do të bëni një marrëveshje ose ne jemi jashtë dhe nëse jemi jashtë, ju do e luftoni i vetëm Rusinë. Unë nuk mendoj se do të jetë e bukur, por duhet ta bëni. Ju jeni në një pozitë shumë më të mirë [me marrëveshjen], por nuk jeni aspak mirënjohës dhe kjo nuk është një gjë e mirë. Unë do të jem i sinqertë.
Në këtë moment, takimi në Zyrën Ovale ka përfunduar.
Në shenjë se sa keq shkuan bisedimet, presidenti amerikan Donald Trump sapo ka postuar një përditësim në rrjetet sociale duke thënë se ai ka vendosur se Zelenskyy “nuk është gati për paqe nëse përfshihet Amerika, sepse ai mendon se përfshirja jonë i jep atij një avantazh të madh në negociata”.
"Ai mund të kthehet kur të jetë gati për paqe,"-shkruan Trump./ZËRI
Të gjithë me sytë nga SHBA/ Sapo ka nisur takimi Zelenskyy-Trump, diskutohet për fundin e luftës dhe mineralet
SHBA- Presidenti ukrainas Volodymyr Zelenskyy u takua me Presidentin e Shteteve të Bashkuara, Donald Trump në Uashington. Kryefjalë e takimit do të jenë garancitë e sigurisë dhe ndihma në parandalimin e një sulmi të ri të mundshëm rus, por edhe nënshkrimi i një marrëveshjeje për mineralet e rralla.
Zelenskyy këmbëngul se marrëveshja ekonomike duhet të shoqërohet me garanci konkrete sigurie. Megjithatë, Trump tha se nuk do të jepte shumë garanci sigurie, sepse ky sipas tij, është roli i Europës dhe Bashkimit Europian.
Sot, Zelenskyy, i cili vazhdon të avokojë për anëtarësimin e Ukrainës në NATO do të përpiqet të marrë përgjigje nga Trump. Pritet që presidenti ukrainas të pyesë nëse SHBA po planifikon të pezullojë ndihmën ushtarake për Ukrainën; apo nëse Kievi do të jetë në gjendje të blejë armë amerikane dhe nëse Ukraina do të jetë në gjendje të përdorë asetet e ngrira ruse për të blerë armë.
Trump ka deklaruar më parë se prania amerikane në sektorin e minierave të Ukrainës mund të shërbejë si "një garanci sigurie", pasi sipas tij askush nuk shkakton dot probleme nëse në zonë ka amerikanë.
Tashmë dy presidentët po zhvillojnë një takim kokë më kokë, ndërsa të paktën 100 reporterë dhe fotografë jashtë Krahut Perëndimor të Shtëpisë së Bardhë po presin që të dalin në një deklaratë për mediat. Më vonë pasdite, në orën 17:00 me orën lokale, Trump do të largohet nga Shtëpia e Bardhë dhe do të udhëtojë për në Palm Beach, ku do të kalojë fundjavën në pronën e tij në Mar-a-Lago./ZËRI
