TIRANË- Policia e Tiranë ka dalë me njoftim zyrtar në lidhje me debatet e zhvilluara një ditë më parë në KZAZ nr.32, ku ishte present edhe Agron Shehaj, kreu i Partisë Mundësia dhe Ministri i Brendshëm Ervin Hoxha. Në njoftim bëhet me dije se rreth orës 20:15, është kërkuar ndërhyrja e Policisë në këtë qendër pasi disa vëzhgues të procesit të numërimit (përfaqësues të subjekteve të ndryshme politike) po konfliktoheshin me njëri-tjetrin.
Nga kjo qendër janë publikuar dhe disa pamje ku Shehaj shihet teksa debaton me Hoxhën. Megjithatë, të shtatë personat që janë konfliktuar, sipas autoriteteve, janë marrë në pyetje dhe më pas janë lënë të lirë.
Njoftimi:
Më datë 12.05.2025, rreth orës 20:15, është kërkuar ndërhyrja e Policisë në KZAZ Nr. 32, pasi disa vëzhgues të procesit të numërimit (përfaqësues të subjekteve të ndryshme politike) po konfliktoheshin me njëri-tjetrin. Në përmbushje të procedurës standarde të punës është ndërhyrë menjëherë dhe janë shoqëruar 7 shtetasit që po konfliktoheshin për motive të dobëta. Në përfundim të marrjes së deklarimeve, 7 shtetasit janë lënë të lirë. Pas konsultimit me prokurorin e gatshëm, materialet hetimore iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
