TIRANË-Gjykata Administrative ka rrëzuar kërkesën e Fredi Belerit, i cili kërkoi pezullimin e zgjedhjeve të pjesshme të 4 gushtit që do të mbahen në Bashkinë e Himarës. Në seancë sot me Belerin është edhe avokatja e tij, Klodiana Gjyzari. Sipas avokates, kreu i shtetit ka mbajtur anë politike pasi dekreti presidencial duhet të shpallej pas 5 gushtit, datë kur përfundonte afati për ankimin e Fredi Belerit.
“Presidenti caktoi një datë pa skaduar afati që Fredi Beleri të ankimoi vendimin e KQZ, ka të drejtë deri më 5 gusht ora 16:00,”-bëri me dije ajo në nisje të seancës.
Por arsyetimi i saj nuk e ka bindur trupën gjykuese, e cila ka rrëzuar kërkesën e Belerit.
Më 5 korrik, Presidenti Bajram Begaj dekretoi 4 gushtin si datë për zgjedhjet e reja në Himarë./ZËRI
