TIRANË- Mbledhja e Komisionit Hetimor Parlamentar për sistemin TIMS, e cila ishte parashikuar që të mbahej këtë të hënë, është shtyrë për ditën e nesërme.
Shkak për shtyrjen e mbledhjes janë bërë kërkesat e dëshmitarëve, por dhe agjenda e ngarkuar parlamentare e anëtarëve të komisionit, informon kryesia e Kuvendit.
Mbledhja me të njëjtin rend dite do të zhvillohet ditën e Martë, datë 11.06.2024
Ora 12:00 - Z. Ardit Muço, Ish Përgjegjës i Sektorit IT në Policinë e Shtetit;
Ora 13:00 – Z. Besjan Tanuzi, Ish Drejtor i Sistemeve, në Policinë e Shtetit;
Ora 14:00 – Znj. Ervina Gjana, Drejtore e Krimit Kibernetik, në Policinë e Shtetit.
Komisioni hetimor parlamentar i TIMS-it ka në fokus hetimin e rrjedhjes së të dhënave nga sistemi TIMS. Për hetimin parlamentar janë kërkuar dokumente dhe informacione shtesë nga një sërë institucionesh shtetërore si Kryeministria, Ministria e Brendshme, Shërbimi Informativ Shtetëror, SPAK dhe Trupi Diplomatik i akredituar në Shqipëri. Komisioni hetimor u ngrit me kërkesën e Partisë Demokratike.
Më herët në Komision kanë dhënë dëshmitë e tyre ministri i brendshëm Taulant Balla, drejtori i përgjithshëm i policisë së shtetit Muhamet Rrumbullaku, si dhe ish-shefi i IT-së në Policinë e Shtetit Ervin Muça. Dëshmitë e tyre janë dhënë me dyer të mbyllura, për shkak të sekretit hetimor.
/ZËRI
