TIRANË- 45 deputetë të Partisë Demokratike kërkojnë nga Gjykata Kushtetuese të pezullojë dhe më pas të shfuqizojë ndryshimet drastike në rregulloren e Kuvendit, që parashikojnë përjashtimin e deputetëve deri në 60 ditë. Në kërkesën e siguruar nga ZËRI kërkohet pezullimi i ndryshimeve të kaluara në parlament deri në dhënien e një vendimi përfundimtar nga gjykata.
Në padi thuhet se rregullorja e re, përmes së cilës deputetët rrezikojnë deri 60 ditë përjashtim, shkel të drejtat e tyre dhe lë qytetarët pa përfaqësim në parlament. Opozita shprehet se maxhoranca i ka bërë ndryshimet pa një konsultim dhe kështu i japin PS-së mundësinë për ndëshkime arbitrare.
"Rregullorja e Kuvendit është akti që garanton bashkëjetesën demokratike të palëve politike në Parlament. Miratimi i saj, ashtu si rishikimi a ndryshimi, kërkojnë detyrimisht konsensus dhe gjithëpërfshirje. Ndryshimet e fundit u propozuan nga mazhoranca, pa asnjë konsultim apo transparencë, u shqyrtuan dhe miratuan me procedurë të përshpejtuar si shenjë e qartë arrogance dhe arbitrariteti, duke synuar ta shndërrojnë Rregulloren në një mjet "disiplinimi" për deputetët e opozitës që guxojnë të protestojnë kundër akteve të mazhorancës. Në kushtet kur këto ndryshime prekin në mënyrë thelbësore të drejtat e deputetëve, vecanërisht deputetëve të opozitës, por gjithashtu cenon përfaqësimin e qytetarëve dhe mirëfunksionimin demokratik të Kuvendit, 45 deputetët kanë kërkuar nga Gjykata pezullimin e këtyre ndryshimeve deri në dhënien e një vendimi përfundimtar", thuhet në deklaratën e opozitës.
Argumentet kryesore të kërkesë janë si vijon:
1. Dispozita e Rregullores që vendosin përjashtimin për 30 - 60 ditë të deputetit, duke i ndaluar edhe të kryej cdo lloj veprimtarie si anëtar i Parlamentit shkel në mënyrë flagrante një sërë të drejtash që deputetit i garantohen nga Kushtetuta dhe ligji. Praktikisht kjo dispozitë nënkupton pezullimin e deputetit nga detyra. Pezullimi nga ushtrimi i një funksioni publik është masë ndaluese që jepet nga gjykata në kuadër të një procesi penal, por edhe në atë rast pezullimi i deputetit është shprehimisht i ndaluar nga neni 242 i Kodit të Procedurës Penale.
2. Dispozitat e Rregullores nuk ndalon vetëm ushtrimin e funksioneve të caktuara të deputetit, por lë pa përfaqësim qytetarët që kanë zgjedhur deputetin subjekt i masave disiplinore, në shkelje flagrante me nenin 71 të Kushtetutës.
3. Ndryshimet në Rregulloren e Kuvendit shkelin kriteret e përcaktuara nga neni 17 i Kushtetutës sa i përket kufizimit të të drejtave, përkatësisht kriterin e ligjshmërisë, interesit publik dhe proporcionalitetit. Ndryshimet përmbajnë paqartë dhe terminologji evazive, duke i krijuar mundësi mazhorancës që t'i përdorë këto mekanizma në mënyrë arbitrare për të ndëshkuar sjelljet që ato i konsideron të papëlqyeshme të deputetëve të opozitës.
4. Këto ndryshime nuk janë frymëzuar nga asnjë interes publik apo qytetar, por vetëm nga interesi politik për të shuar zërin e deputetëve opozitarë, sic pranohet në relacionin e propozuesve dhe raportin që ka miratuar Këshilli i Mandateve. Masat disiplinore 30 - 60 ditë, veçanërisht parashikimi i pezullimit të ushtrimit të detyrës gjatë kësaj periudhe, është një masë tërësisht disproporcionale.
5. Organi që merr vendimet për masat disiplinore është një organ politik, i drejtuar dhe me shumicë nga mazhoranca, që nuk ofron asnjë lloj garancie sa i përket pavarësisë, paanshmërisë dhe objektivitetit në vendimmarrje. Mungesa e këtyre garancive rrezikon ta shndërrrojë Rregulloren e Kuvendit në një mjet arbitrar në duart e mazhorancës për të ndëshkuar deputetët e opozitës. Në këto kushte cënohet edhe e drejta për proces të rregullt ligjor, e garantuar nga neni 42 i Kushtetutës dhe neni 6 i Konventës Evropiane të të Drejtave të Njeriut.
6. Ndryshimet në Rregullore cënojnë parimin e shtetit të së drejtës dhe hierarkisë së normave, parashikuar nga neni 81 i Kushtetutës, pasi ato vijnë në kundërshtim me Kodin e Procedurave Administrative dhe Kodin e Procedurës Penale. Konkretisht, dispozita e Rregullores që sanksionon pezullimin e ushtrimit të funksionin të deputetit vjen në kundërshtim me nenin 242 të Kodit të Procedurës Penale, ndërsa dispozita që parashikon se ankimi nuk pezullon automatikisht vendimin e Sekretariatit për Etikën, vjen në kundërshtim me nenin 133 të Kodit të Procedurave Administrative. Rregullorja është një akt që miratohet me 71 vota, ndërsa ligjet e mësipërme miratohen me 84 vota, prandaj Rregullorja duhet të jetë detyrimisht në përputhje me këto akte, në përputhje me parimin kushtetues të hierarkisë së normave, parashikuar nga neni 81 i Kushtetutës.
7. Mazhoranca ka shkelur afatin 7-ditor të përcaktuar nga neni 83, pika 2, e Kushtetutës dhe neni 28 i Rregullores së Kuvendit sa i përket shqyrtimit dhe miratimit me procedurë të përshpejtuar të një vendimi, pasi ndryshimet në Rregullore u miratuan pa kaluar akoma ky afat.
Rregullorja e Kuvendit është akti që garanton bashkëjetesën demokratike të palëve politike në Parlamant. Miratimi i saj, ashtu si rishikimi a ndryshimi, kërkojnë detyrimisht konsensus dhe gjithëpërfshirje. Ndryshimet e fundit u propozuan nga mazhoranca, pa asnjë konsultim apo transparencë, u shqyrtuan dhe miratuan me procedurë të përshpejtuar si shenjë e qartë arrogance dhe arbitrariteti, duke synuar ta shndërrojnë Rregulloren në një mjet "disiplinimi" për deputetët e opozitës që guxojnë të protestojnë kundër akteve të mazhorancës.
Në kushtet kur këto ndryshime prekin në mënyrë thelbësore të drejtat e deputetëve, vecanërisht deputetëve të opozitës, por gjithashtu cënon përfaqësimin e qytetarëve dhe mirëfunksionimin demokratik të Kuvendit, 45 deputetët kanë kërkuar nga Gjykata pezullimin e këtyre ndryshimeve deri në dhënien e një vendimi përfundimtar.
DEPUTETËT QË FIRMOSËN KUNDËR RREGULLAVE TË REJA TË PARLAMENTIT
Gazment Bardhi
Lefter Gështenjta
Albana Vokshi
Sorina Koti
Zheni Gjergji
Xhelal Mziu
Ramadan Likaj
Lindita Metaliaj
Asllan Dogjani
Greta Bardeli
Edmond Spaho
Kasem Mahmutaj
Saimir Koreshi
Kastriot Piroli
Qani Xhafa
Dhurata Çupi
Luan Baçi
Ina Zhupa
Agron Gjekmarkaj
Elda Hoti
Dashnor Sula
Jorida Tabaku
Oerd Bylykbashi
Sali Berisha
Flamur Noka
Edi Paloka
Isuf Çela
Petrit Doda
Fatmir Mediu
Tritan Shehu
Bujar Leskaj
Vangjel Dule
Helidon Bushati
Petrit Vasili
Erisa Xhixho
Monika Kryemadhi
Ilda Dhori
Ludovik Hasani
Tomor Alizoti
Ferdinand Xhaferi
Agron Duka
Ervin Salianji
Bledion Nallbati
Rregullorja e re u vendos në fuqi më datë 18 dhjetor dhe ndryshimet janë bërë pas kaosit, që deputetët e Berishës dhe të Bardhit janë duke krijuar prej disa javësh në Kuvend, teksa kanë ndezur tymuese dhe fishekzjarre në sallë. Padia është firmosur edhe nga deputetët e Partisë së Lirisë, të cilët nuk kanë krijuar skena të pakëndshme në parlament, por kanë mbështetur publikisht grupin parlamentar të PD-së./ZËRI/
