FOTOLAJM- E ashpër! Noka grushton në Kuvend gardistin
TIRANË- Deputeti i Partisë Demokratike, Flamur Noka është përplasur me një gardist në seancën e sotme në Kuvend. Siç duket edhe nga pamjet nga afër që ka mundur që të kapë LSA, Noka ka grushtuar në fytyrë një prej punonjësve të Gardës.
E gjitha sepse ai tentoi ta ndalonte për të shkuar tek deputeti Vullnet Sina, i cili mori fjalën për të folur nga karrigia e tij. Në fund, edhe Sinën, Noka e ndaloi duke i fikur mikrofonin./ZËRI
Ndodh sërish! Flamur Noka përplaset me Gardën, i mbyll mikrofonin deputetit të PS
TIRANË- Opozita ka vijuar me të njëjtin skenar për të mbyllur sa më shpejt seancën e sotme plenare. Deputetët demokratë ishin pajisur me pankarta dhe bilbila, teksa këtë herë kanë munguar tymueset.
Kryeparlamentarja, Lindita Nikolla fillimisht largoi Gardën dhe u kaloi fjalën deputetëve socialistë. E para që foli ishte Edona Bilali dhe pas saj e mori fjalën Vullnet Sinaj. Mirëpo ky i fundit nuk ka mundur të flasë pasi, deputeti demokrat më aktivi në raste të tilla është përplasur me Gardën dhe më pas i ka afruar bilbilin në mikrofon.
Pas kaosit, kryeparlamentarja ka ndërprerë seancën e cila zgjati vetëm 7 minuta./ZËRI
Noka i afrohet Spiropalit, i dorëzon pankartën në duar, ministrja e kalon me batuta
TIRANË- Deputeti i Partisë Demokratike, Flamur Noka i është afruar sot ministres së Shtetit për Marrëdhëniet me Parlamentin, Elisa Spiropali duke i lënë në duar një pankartë. Teksa ishin mbledhur para Foltores së Kuvendit, Noka është shkëputur nga kolegët dhe i ka dhënë në duar Spiropalit pankartën që lexonte: Gjykatat janë për drejtësi dhe jo miqësi politike!
Teksa Noka i dorëzoi pankartën, gjatë gjithë momentit ministrja ia aprovonte me kokë në shenjë ironie të gjitha ato që thoshte demokrati. Madje për disa sekonda i mbajti edhe pankartën. Kështu nga të dy palët, situata kaloi pa tensione. Pasi kreu "misionin" e tij, Noka iu bashkua kolegëve të tjerë duke krijuar zhurmë për të penguar zhvillimin e seancës. Kjo e fundit, si kurrë më parë, sot zgjati vetëm 7 minuta./ZËRI
Opozita 'protestë' edhe seancën e sotme, Nikolla: Jemi për zgjedhësit, jo bilbilat tuaj
TIRANË- Ka nisur me debate seanca e sotme parlamentare ku pritej të diskutohej mbi “hallet e qytetarëve”, por opozita vijoi me të njëjtin skenar. Deputetët demokratë me pankarta në duar bllokuan foltoren dhe krijuan kaos në përpjekje për të ndërprerë sa më shpejt seancën. Thirrjet e kryeparlamentares u injoruan, teksa deputetët e opozitës po u binin në korr bilbilave.
"Të nderuar kolegë ju bëj thirrje edhe njëherë ju lutem zini vendet tuaja të vijojmë me diskutimet e çështjeve të evidentuara nga zgjedhësit. Zgjedhësit duan të dëgjojnë për hallet e shqetësimet e tyre, jo bilbilat tuaja. Ju lutem, zonja Edona Bilali,” tha Nikolla.
Seanca si kurrë më parë ka zgjatur vetëm 7 minuta./ZËRI
