PARIS- Dy gra kanë hedhur supë në drejtim të pikturës së Mona Lisës, e cila mbahet në muzeun e Luvrit. Piktura e shekullit të 16-të nga Leonardo da Vinci është një nga veprat më të famshme të artit në botë, ndërkohë që është e rrethuar me një xham antuplumb, dhe ka pak gjasa që të jetë dëmtuar nga sulmi i dy grave. Video e BBC tregon dy protestuese femra të veshura me bluza që lexojnë “përgjigje ushqimore” duke hedhur supë mbi pikturën.
Më pas ato qëndrojnë përballë, duke kërkuar të drejtën për “ushqim të shëndetshëm dhe të qëndrueshëm”, ndërsa thonë se “sistemi ynë bujqësor është i sëmurë”. Sigurimi i muzeut më pas shihet duke vendosur ekrane të zeza përpara tyre përpara se dhoma të evakuohet.
Kryeqyteti francez ka parë protesta nga fermerët ditët e fundit, duke bërë thirrje për t’i dhënë fund rritjes së kostove të karburantit dhe për thjeshtimin e rregulloreve. Të premten ata bllokuan rrugët kryesore brenda dhe jashtë Parisit në përpjekje për të tërhequr vëmendje në kauzën e tyre.
Mona Lisa ka qenë pas xhamit të sigurisë që nga fillimi i viteve 1950, kur u dëmtua nga një vizitor që hodhi acid mbi të. Në vitin 2019, muzeu tha se kishte instaluar një formë më transparente xhami antiplumb për ta mbrojtur atë.
Në vitin 2022, një aktivist hodhi një tortë mbi pikturën, duke u kërkuar njerëzve të “mendonin për Tokën”. Piktura u vodh nga Luvri në vitin 1911, duke shkaktuar një sensacion ndërkombëtar. Vincenzo Peruggia, një punonjës i muzeut më të vizituar në botë, u fsheh në një dollap gjatë natës për të marrë pikturën.
Ajo u gjet dy vjet më vonë kur ai u përpoq t’ia shiste një tregtari antik në Firence, Itali./ZËRI
