TIRANË- Shoqata Mikrofinanca Shqiptare është distancuar nga të ashtuquajturat "Shoqëritë e Mbledhjes së Kredive", për të cilat pretendojnë se operojnë nëpërmjet praktikave anti-ligjore dhe që prej muajsh denoncohen nga qytetarë të shumtë pranë redaksisë së ZËRIT. Shoqata Mikrofinanca Shqiptare në një reagim zyrtar shkruan se distancohen nga këto shoqëri dhe mënyrën sesi i mbledhin borxhet e qytetarëve duke theksuar se vetë ata nuk blejnë kredi të këqija nga asnjë bankë apo institucion tjetër kredidhënës. Ndaj, në një kohë kur hetimet për këtë çështje i ka nisur edhe Struktura e Posaçme kundër Korrupsionit dhe Krimit të Organizuar, "SHMSH" thekson se janë të gatshëm që të bashkëpunojnë me autoritetet ligjvënëse dhe ligjzbatuese për hartimin e një kuadri ligjor lidhur me mbledhjen e borxheve që kanë marrë qytetarët.
