TIRANË- Skënder Hita është zgjedhur Drejtor i Policisë së Shtetit. Vendimi është miratuar sot në mbledhjen e Këshillit të Ministrave. Hita do të marrë drejtimin e Policisë pas largimit nga detyra të Ilir Prodës. Gara u hap më 1 mars, ku Hita është vlerësuar mes 14 kandidatëve. Në 5 vitet e fundit, Hita ka qenë drejtues në qarqet më të vështira në vend, Shkodër, Durrës, Dibër dhe së fundmi në Fier. Rrugëtimi i tij në poste drejtuese nisi në qarkun e Shkodrës, ku shërbeu si drejtor i hetimit të krimit. Më pas, ai mori drejtimin e Policisë në Durrës. Në profilin e tij profesional evidentohet gjithashtu fakti se gjatë gjithë karrierës në Policinë e Shtetit, emri i Skënder Hitajt nuk është përfolur për lidhje me krimin apo me grupe kriminale. Në vitin 2021, Hita kaloi procesin e vetingut në polici. Komisioni i Jashtëm i Vlerësimit konfirmoi pastërtinë e figurës së tij dhe nuk gjeti probleme as në komponentin e pasurisë, as në aftësitë profesionale.
/ZËRI
