LEZHË- Ish-nënkryetari i PD-së për njësinë administrative Dajç, Sokol Toma, ka rënë pre e një sulmi mbrëmjen e kaluar. Ai është goditur nga persona të maskuar me sende të forta, duke i shkaktuar dëmtime të rënda në trup. Ngjarja e rëndë është regjistruar rreth orës 22:00 në aksin rrugor Mamurras-Laç, në zonën e Sanxhakut.
Ai është gjetur rastësisht nga kalimtarët, në gjendje shoku. Për shkak të gjendjes së rënduar shëndetësore, 53-vjeçari është dërguar me urgjencë drejt Spitalit të Traumës në Tiranë për trajtim më të specializuar mjekësor.
Sipas burimeve nga Spitali i Traumës, autorët e ngajrjes i kanë thyer këmbët dhe i kanë prerë veshin. Ndërkohë zbulohet se Toma është shtruar në pavijonin e ortopedisë.
Menjëherë pas ngjarjes, autoritetet kanë nisur hetimet për zbardhjen e plotë të rrethanave dhe motiveve të këtij sulmi, që ende mbeten të paqarta./ZËRI
