TIRANË- Këshilli i Lartë i Prokurorisë (KLP), do të mblidhet më 1 shtator për të diskutuar mbi mbarimin e mandatit të drejtueses së Byrosë Kombëtare të Hetimit (BKH), Aida Hajnaj. Mbledhja do të zhvillohet në prezencë të Anëtarëve të Këshillit të Lartë të Prokurorisë, si dhe përfaqësuesve nga Prokurori i Përgjithshëm, Ministria e Drejtësisë, Projekti Eu4Justice dhe Programi OPDAT.
Ndërkohë sot, është mbledhur Komisioni i Pastërtisë dhe Figurës i ngritur për procesin e zgjedhjes së kreut të ri të BKH, për të shqyrtuar dokumentacionin e kandidatëve në garë. Komisioni përbëhet nga dy prokurorët e SPAK, Behar Dibra dhe Eneid Nakuçi, kryetarja e Apelit të GJKKO-së Saida Dollani, si dhe dy agjentë të BKH-së.
SPAK publikoi në muajin korrik emrat e shtatë kanidatëve fitues që kaluan në fazën e dytë të garës për zgjedhjen e kreut të BKH-së. Kandidatët në garë janë: Andi Pogaçe, Artur Beu, Elton Kërluku, Gentian Ndoi, Gentjan Shehaj, Gledis Nano dhe Joni Keta. Për secilin prej tyre, do të caktohet një një relator përmes shortit, i cili do të kryejë verifikimet e nevojshme./ZËRI
