TIRANË-Një operacion i zhvilluar mbrëmjen e djeshme (13 prill) në Tiranë, çoi në goditjen e tre Call Centerave, të cilët dyshohet se kryenin aktivitete të paligjshme duke mashtruar qytetarë europianë me qëllim zhvatjen e shumave të mëdha të parave. Hetimet kanë zbuluar se këto struktura dyshohet se mashtronin shtetas të huaj, kryesisht nga Austria, Italia, Spanja, Greqia, Kanadaja dhe Shtetet e Bashkuara të Amerikës.
Dy prej godinave ndodheshin në zonën pranë Kopshtit Zoologjik, ndërsa një tjetër në Rrugën e Kavajës. Vetëm në Call Center-in që ndodhej te Rruga e Kavajës janë gjetur brenda gjatë operacionit 60 punonjës, të cilët janë marrë në pyetje.
Aksioni është kryer nën drejtimin e Prokurorisë së Tiranës, ku janë lëshuar 9 masa sigurie, ku mësohet se për 7 persona është firmosur masa 'arrest në burg', ndërsa 2 të tjerë janë me masë ndalimi i daljes jashtë vendit dhe detyrim me paraqitje. Në pranga janë vendosur Eduart Dalla, Mateo Hoxha dhe Tedi Agastra. Gjatë kontrolleve të ushtruara nga autoritetet, është sekuestruar një shumë rreth 1 milion euro cash, të ardhura të cilat dyshohet se lidhen me aktivitetin e paligjshëm.
Autoritetet po punojnë për identifikimin e plotë të personave të përfshirë dhe dokumentimin e aktivitetit të dyshuar kriminal./ZËRI
