DURRËS-Orges Dumitru alias Kacmoli, 40 vjeç është arrestuar në Durrës në kuadër të operacionit policor “Wanted 36”. 40-vjeçari rezulton i dënuar në Itali me 11 vjet e 1 muaj burgim për trafik droge e falsifikim dokumentash. I shpalluri në kërkim ndërkomëtar do të ekstradohet drejt Italisë, ku i kanë mbetur për të vuajtur dhe 4 vjet e 15 ditë burgim.
Njoftimi i policisë:
Finalizohet operacioni i koduar “Wanted 36”, për kapjen e një shtetasi ndërkombëtar.
I dënuar në Itali, me 11 vjet e 1 muaj burgim, kapet në Durrës dhe arrestohet me qëllim ekstradimin, 40-vjeçari.
Seksioni për Mbështetjen Operacionale të Hetimit i DVP Durrës, në vijim të punës për lokalizimin dhe kapjen e shtetasve të shpallur në kërkim, bazuar dhe në informacionet e siguruara në rrugë operative, organizoi dhe finalizoi në bashkëpunim me Seksionin për Hetimin e Narkotikëve dhe Trafiqeve, operacionin e koduar “Wanted 36”.
Si rezultat i operacionit, u kap në lagjen nr. 12, Durrës, dhe u arrestua me qëllim ekstradimin në Itali, shtetasi O. D. alias O. K., 40 vjeç.
Ky shtetas ishte shpallur në kërkim ndërkombëtar, pasi Gjykata e Apelit e Venecias, Itali, e ka dënuar me 11 vjet e 1 muaj burgim, për veprat penale "Trafikimi i lëndëve narkotike” dhe “Falsifikimi dhe mbajtja e dokumenteve të rreme”. Nga ky dënim i kanë mbetur për të vuajtur 4 vjet e 15 ditë burgim.
Interpol Tirana, në bashkëpunim me homologët italianë, vijon procedurat për ekstradimin e këtij shtetasi në Itali.
