TIRANË- Një 44-vjeçar është arrestuar në Tiranë, pasi ishte shpallur në kërkim ndërkombëtar nga Australia. Në pranga ka rënë Korab Halilaj, i cili është dënuar me burg në Australi për trafik droge. Interpol Tirana po bashkëpunon me homologët, për të finalizuar procedurën për ekstradimin e 44-vjeçarit
“Si rezultat i bashkëpunimit me homologët australianë, nëpërmjet Interpol Tiranës, dhe punës operacionale të mirorganizuar, Forca e Posaçme Operacionale, në bashkëpunimin me Seksionin për Hetimin e Narkotikëve, gjatë operacionit “Kontinenti”, lokalizoi dhe arrestoi shtetasin Korab Halilaj, 44 vjeç, banues në Tiranë.
Ai ishte i kërkuar ndërkombëtarisht, sepse Gjykata e New South Wales, Australi, i ka caktuar masën e sigurisë “Arrest në burg”, për shkelje të ligjit mbi narkotikët.
Interpol Tirana po bashkëpunon me homologët, për të finalizuar procedurën për ekstradimin e 44-vjeçarit”, njofton Policia./ZËRI
