TIRANË- Sekretariati i Etikës në Kuvend ka shqyrtuar kërkesat për masa ndëshkuese ndaj deputetëve, pas tensioneve të regjistruara në seancën e 2 prillit. Pas mbledhjes, është vendosur përjashtimi me 20 ditë i deputetit Flamur Noka dhe me 10 ditë i deputetes Elda Hoti. Ndërkohë, deputetët Albana Vokshi dhe Taulant Balla nuk janë ndëshkuar me përjashtim.
Grupi Parlamentar i Partisë Socialiste kërkoi përjashtimin Sekretarit të Përgjithshëm të PD-së, Flamur Nokës dhe deputeteve demokrate, Albana Vokshit dhe Elda Hotit. Në seanën e 2 prillit, Hoti tentoi t’i hiqte kartën e deputetes nga pajisja për të ndërprerë fjalën e Bora Muzhaqit, ndërsa opozita bllokoi sallën. Ndërsa Noka, goditi me shishe uji kreun e grupit parlamentar socialist dhe kërcënoi Ballën.
Nga ana tjetër, Grupi Parlamentar i Partisë Demokratike kërkoi përjashtimin e kreut të Grupit Parlamentar të PS-së, Taulant Balla, për 60 ditë nga seancat plenare dhe komisionet. Në kërkesën e dorëzuar, demokratë argumentojnë se Balla ka përdorur gjuhë fyese ndaj deputetes Elda Hoti, në seancën e 2 prillit. Ata shtojnë se me të njëjtën sjellje, Balla i është drejtuar edhe deputetit Fatmir Mediu./ZËRI
