TIRANË- Tragjedia e familjes Kola në Itali ka tronditur jo vetëm komunitetin atje, por edhe vendin tonë. Katër anëtarët e familjes: Arti Kola, Jonida Kola, Hajdar Kola dhe Xhesika Kola, humbën jetën pas asfiksisë nga gazi.
Ndërkohë, familjari i tyre, vëllai i Artit, Durim Kola, ka hapur një GoFoundMe me qëllim mbledhjen e fondeve për përballimin e shpenzimeve të funeralit dhe transportin e trupave drejt Shqipërisë. Sipas njoftimit, bëhet me dije se pjesa që do të mbesë nga mbledhja e fondeve do të shërbejë për të ndihmuar familjet e tyre.
Në linkun e GoFoundMe mund të konfirmohet se deri më tani është mbledhur shuma prej 13,980 euro, nga 28 mijë eurot e kërkuara.
“Unë jam Durim Kola. Jam duke mbledhur fonde për humbjen e familjes së vëllait tim, të cilët humbën jetën si pasojë e një aksidenti të shkaktuar nga kaldaja e gazit në Porcari, në Provincën e Luccës. Fondet do të përdoren për shpenzimet e funeralit dhe për transportin e trupave në SHQIPËRI, ku do të zhvillohen edhe ceremonitë mortore. Pjesa e mbetur e fondeve do të shërbejë për të ndihmuar familjet e tyre”, shkruan Durim Kola, vëllai i viktimës, Arti Kola.
Ngjarja u shënua mbrëmjen e 4 shkurtit. Gjatë hyrjes në banesë, forcat e policisë dhe ekipet e emergjencës gjetën tryezën të shtruar, çka tregon se familja ishte bërë gati për të ngrënë.
Dinamika
Në orën 19:58 të së mërkurës, Hajdari telefonoi në numrin 112, i cili e lidhi me numrin 118. "Motra ime është e sëmurë", i tha ai operatorit gjatë një telefonate 11-minutëshe. Pastaj i riu humbi ndjenjat. Ambulanca mbërriti në orën 20:03, por adresa ishte e gabuar: Kola kishte thënë - ndoshta i tronditur nga monoksidi i karbonit - se jetonte në shtëpinë me numër 168 në vend të 186. Në thelb, treqind e pesëdhjetë metra larg adresës së saktë. Ambulanca nuk u largua, duke pyetur fqinjët, duke rënë zileve të derës, por nuk mundi të gjente adresën e saktë. Në këtë pikë, u thirrën karabinierët për ndihmë, të cilët arritën të gjurmonin personin që ngriti alarmin dhe kështu të identifikonin adresën e saktë.
Në orën 9:46 të mbrëmjes, ambulancat mbërritën në derën e familjes Kola. Turim Kola, vëllai i kryefamiljarit dhe dy oficerë të karabinierisë u përpoqën të hynin në shtëpi, por nuk kishte oksigjen. Edhe ata u sëmurën. Ndërkohë, zjarrfikësit mbërritën në vendngjarje dhe siguruan ndërtesën. Megjithatë, ekipi i urgjencës mjekësore shpalli të vdekur Artin Kolën, gruan e tij Jonidën dhe fëmijët e tyre Hajdar dhe Xhesikë, të cilët u gjetën në dhomën e gjumit.
"Nuk munda t'i shpëtoja, nuk munda t'i shpëtoja", Turim Kola, e përsërit atë vazhdimisht para familjes dhe miqve të tij. Ai sapo ka dalë nga spitali në Piza ku po kurohej për helmim. "Më ra të fikët", thotë ai./ZËRI
