GJIROKASTER- Një fluks emigrantësh nga Greqia po vjen për në Shqipëri për tju drejtuar kutive të votimit. ZËRI mësoi se gjatë 24 orëve të fundit në Kakavije kanë hyrë gati 3500 qytetarë shqiptarë, me një rritje të fluksit prej 20%. Edhe pse këtë vit, u mundësua vota e Diasporës, ky proces hasi në problematika në Greqi dhe kjo mesa duket i ka orientuar qytetarët që të vijnë vetë e të votojnë në Shqipëri.
3.7 milionë shtetas shqiptarë do t’i drejtohen sot kutive të votimit për të zgjedhur 140 përfaqësuesit e tyre në Parlament. Votimi ka nisur në 07:00 në të gjithë vendin dhe mbyllet në 19:00. Në mbarë vendin janë ngritur 5,225 qendra votimi. Në fletën e votimit, shqiptarët do të gjejnë kësaj radhe 11 subjekte politike, ku 3 janë koalicione, dhe 9 janë parti që garojnë të vetme./ZËRI
