TIRANË- Pas gati 2 vitesh në kërkim, Policia e Shtetit ka vendosur në pranga Gabriele Peqinin, një 30-vjeçar, i cili akuzohet për tentativë vrasjeje. I riu është vendosur në pranga mbrëmjen e djeshme në hyrje të Tiranës. Gjatë kontrollit të bërë nga Policia, ka rezultuar se Peqini kishte me vete një armë zjarri dhe mjete identifikimi të falsifikuara. I riu ishte shpalllur në kërkim për plagosjen e Daniel Bushit, të kryer më 2 Dhjetor 2022, në lagjen nr. 17 në Durrës. Ngjarja u mësua pasi asokohe 38-vjeçari i plagosur shkoi vetë në spital për të marrë ndihmën e parë mjekësore. Edhe Daniel Bushi nuk ishte i panjohur për Policinë, pasi në vitin 2016 ishte arrestuar për armëmbajtje pa leje.
NJOFTIMI I PLOTË:
Tiranë
Finalizohet operacioni policor i koduar "Flagranca" nga shërbimet e Komisariatit të Policisë Nr. 6 në bashkëpunim me ato të Seksionit të Forcës së Posaçme të Operacioneve Speciale dhe Sektorin për Hetimin e Narkotikëve në DVP Tiranë. Kapet dhe arrestohet një shtetas i shpallur në kërkim për tentativë vrasje, me rekorde të shumta kriminale dhe rrezikshmëri të lartë shoqërore. 30-vjeçari qarkullonte i armatosur, me mjete identifikimi të dyshuara të falsifikuara si dhe posedonte lëndë të dyshuara narkotike.
Shërbimet e Komisariatit të Policisë Nr. 6 në bashkëpunim me ato të Seksionit të Forcës së Posaçme të Operacioneve Speciale dhe Sektorin për Hetimin e Narkotikëve në DVP Tiranë, në vijim të punës për lokalizimin, kapjen dhe vënien përpara përgjegjësisë penale të shtetasve të shpallur në kërkim, bazuar dhe në informacionet e siguruara në rrugë operative, për vendndodhjen e një shtetasi me rrezikshmëri të lartë shoqërore të shpallur në kërkim për tentativë vrasje, i cili qarkullonte i armatosur, organizuan dhe finalizuan operacionin policor të koduar "Flagranca".
Si rezultat i këtij operacioni, në afërsi të mbikalimit te Casa Italias, është lokalizuar dhe arrestuar shtetasi G. P., 30 vjeç. Ky shtetas ishte shpallur në kërkim pasi Gjykata e Shkallës së Parë e Juridiksionit të Përgjithshëm Durrës i ka caktuar masën e sigurimit personal "Arrest në burg", për veprën penale "Vrasja me dashje", mbetur në tentativë. 30-vjeçari, në vitin 2022, në Durrës, për motive të dobëta, ka tentuar të vrasë me armë zjarri një shtetas. Gjatë kontrollit fizik shërbimet e Policisë i gjetën dhe sekuestruan një armë zjarri pistoletë me krëhra e municion luftarak, dy mjete identifikimi të dyshuara të falsifikuara dhe sasi lënde të dyshuar narkotike. Materialet i kaluan Prokurorisë./ZËRI
