TIRANË- Komisioni i Ligjive, do të diskutojë këtë të mërkurë projektrezolutën për Prokurorinë e Posaçme Kundër Korrupsionit dhe Krimit të Organizuar. Në 10 pikat e kësaj projektrezolute vihet theksi tek çështjet e mbartura, ndërsa kërkohet që të intensifikohen hetimet për rastet e krimit të organizuar, pastrimit të parave apo trafikut të paligjshëm.
Ndër të tjera vihet theksi dhe tek krimet zgjedhore, veçanërisht fakteve të bëra publike në media para, gjatë dhe pas procesit zgjedhor. Po ashtu kërkohet që të tregohet vëmendje e shtuar ndaj denoncimeve që vijnë nga publiku si dhe të rritet numri i hetimeve të kryera nga prokurorët e Prokurorisë së Posaçme për çështje me ndjeshmëri të lartë publike.
Projektrezoluta drejtuar SPAK:
1. Të hartohet një strategji e posaçme për prioritizimin e çështjeve dhe procedimeve të mbartura;
2. Të intensifikohen hetimet paralele financiare për rastet e krimit të organizuar, trafikut të paligjshëm, terrorizmit dhe pastrimit të parave.
3. Të vijojë angazhimin në sigurimin e aplikimit të uniformizuar të standardeve të hetimit dhe ndjekjes penale, duke garantuar barazinë para ligjit.
4. Të vijohet me forcimin e kapaciteteve njerëzore dhe teknike me fokus hetimet financiare e të kriptovalutave.
5. T’i kushtohet vëmendje krimeve zgjedhore, veçanërisht fakteve të bëra publike në media para, gjatë dhe pas procesit zgjedhor, për të filluar hetimin kryesisht në rastet kur ka njoftime publike për kryerjen e një vepre penale.
6. Të tregohet një vëmendje e shtuar ndaj denoncimeve që vijnë nga publiku si dhe të rritet numri i hetimeve të kryera nga prokurorët e Prokurorisë së Posaçme për çështje me ndjeshmëri të lartë publike.
7. Të angazhohet në plotësimin e vakancave me qëllim funksionimin në eficencë të plotë të Prokurorisë së Posaçme dhe Byrosë Kombëtare të Hetimit.
8. Të përmbyllë procesin e hartimit dhe miratimit të akteve të tjera nënligjore të cilat rezultojnë pa miratuar, për të përfunduar plotësimin e kornizës strategjike institucionale.
9. Të angazhohet në pilotimin dhe testimin e Sistemit të Menaxhimit të Çështjeve, me qëllim vënien në efiçencë brenda vitit 2024, duke pasur parasysh rëndësinë e këtij sistemi në punën e Prokurorëve dhe Hetuesve të strukturës.
10. Të angazhohet në përmbushjen me efektivitet të detyrimeve institucionale në kuadër të raportimeve gjatë procesit të integrimit në Bashkimin Europian./ZËRI
