KUKËS- Një 34-vjeçar i identifikur me inicialet E.K është vënë në prangat e Policisë së Kukësit këtë të dielë pas akuzohet për vrasje me dashje të mbetur në tentativë. Sipas bluve të qytetit verior, gjatë një konflikti të çastit, E.K ka tentuar të vrasë me thikë një tjetër 34-vjeçar. Ky i fundit i është kundërpërgjigjur me sende të forta, ndërsa është vënë nën hetim nga policia për plagosje të rëndë me dashje. I plagosuri ndodhet në spitalin e Prizrenit jashtë rrezikut për jetën.
NJOFTIMI I POLICISË:
Kukës. Specialistët për Hetimin e Krimeve të Rënda të Drejtorisë Vendore të Policisë Kukës bënë arrestimin në flagrancë të shtetasit E. K., 34 vjeç, banues në Kukës, i dyshuar për kryerjen e veprës penale "Vrasja me dashje”, mbetur në tentativë. Gjithashtu, referuan materialet në Prokurori, ku nisi procedimi në gjendje të lirë për shtetasin A. C., 34 vjeç, banues në Kukës, i dyshuar për kryerjen e veprës penale "Plagosja e rëndë me dashje”.
Më datë 15.06.2024, në lagjen nr. 3, Kukës, gjatë një konflikti të çastit, për motive të dobëta, shtetasi E. K. ka tentuar të vrasë me mjet prerës (thikë), shtetasin A. C., i cili e ka goditur me sende të forta, shtetasin E. K. Si pasojë, shtetasi A. C. është dëmtuar me mjet prerës (thikë) dhe ndodhet në spitalin e Prizrenit, në kujdesin e mjekëve, ndërsa shtetasi i arrestuar E. K. është dëmtuar me sende të forta dhe ndodhet në spital, jashtë rrezikut për jetën. Materialet procedurale i kaluan Prokurorisë së Juridiksionit të Përgjithshëm Kukës, për veprime të mëtejshme./ZËRI
