ROMË- Një pasdite relaksuese u shndërrua në një kaos të pastër për pak sekonda në Maccarese, në bregdetin në veri të Romës, ku një tornado goditi papritur plazhin duke ngritur çadrat në ajër dhe duke shkaktuar panik te pushuesit. Incidenti ndodhi në orët e para të pasdites së djeshme, ndërsa plazhi ishte i mbushur me familje dhe turistë. Fenomeni i papritur dhe i dhunshëm i motit përfshiu shpejt vijën bregdetare, duke prekur të paktën tre vendpushime plazhi.
View this post on Instagram
Sipas dëshmitarëve, moti u përkeqësua papritur dhe një erë e fortë përfshiu plazhin, duke hedhur çadra dhe shezlongje. Ata thonë që përjetuan momente paniku, por pak më vonë gjithçka u kthye në normalitet.
“Moti u përkeqësua papritur dhe filloi të frynte shumë fort. Çadrat u hodhën në ajër. Zgjati disa minuta, por njerëzit ishin të frikësuar dhe vrapuan për t’u fshehur. Pati panik, por për fat të mirë askush nuk u lëndua. Pak më vonë, gjithçka u kthye në normalitet”, tha një punonjës në një dyqan plazhi në zonë.
Sipas autoriteteve vendase, fatmirësisht nuk ka raportime për të lënduar rëndë, megjithëse disa persona kanë pësuar lëndime të lehta për shkak të sendeve që fluturuan në ajër./ZËRI
