IZRAEL- Kryeministri i Izraelit, Benjamin Netanyahu, ka deklaruar se forcat izraelite do të vazhdojnë veprimet ushtarake derisa të arrihen të gjitha objektivat e luftës dhe të neutralizohen kërcënimet nga Irani.
“Ne do të vazhdojmë me forcë të plotë, në të gjitha frontet, derisa kërcënimi të eliminohet dhe të arrihen të gjitha qëllimet e luftës”, tha ai në një postim në platformën X, duke iu referuar kështu edhe operacionit të fundit të forcave izraelite, të cilat vranë kreun e inteligjencës së Gardës Revolucionare, Majid Khademi.
Në të njëjtën kohë, ai u ndal edhe tek vrasja e drejtorit të njësisë sekrete 840 të Forcës Quds të Gardës Revolucionare, Yazdan Mir, i njohur me pseudonimin Sardar Bagheri. Sipas Netanyahut, Bagheri konsiderohet përgjegjës për sulmet kundër hebrenjve dhe izraelitëve në rajone të ndryshme të botës.
Kryeministri izraelit paralajmëroi se kushdo që merr pjesë në sulme ose kontribuon në krijimin e të ashtuquajturit “bosht iranian” do të mbajë përgjegjësi për pasojat e veprimeve të tyre. /ZËRI
