GREQI- Autoritetet greke kanë zbuluar lidhjet e krimit me Policinë greke falë mesazheve të shkëmbyera në aplikacionin "SkyECC". Në vazhdën e aksionit të koordinuar nga DEA amerikane ku u kapën 310 kg kokainë që ishte fshehur në karkaleca dhe po vinte në Shqipëri, duket se trafikantët kishin marrë një garanci nga efektivët e Policisë. Media greke "MEGA" ka zbuluar se oficerët e policisë greke që shërbenin në Atikë përdornin rrjete të inkriptuara që të mos kapeshin teksa komunikonin me kriminelë. Por më i përdoruri duket se edhe në Greqi ka qenë rrjeti "SKY-ECC".
SKY–ECC ishte një aplikacion, i krijuar nga kompania Sky Global me seli në Kanada ku ishin "abonuar" 171,000 kriminelë pasi kishin garanci se mesazhet e tyre nuk do të dilnin kurrë në dritë. Kjo platformë komunikimesh “të padukshme” përdorej nga rrjete e krimit që merreshin me trafikun e kokainës, heroinës, metamfetaminës etj. Nga këto mesazhe në Greqi është zbuluar se një zjarrfikës ka qenë i përfshirë në një aksion kur mbeti i vrarë një efektiv i identifikuar si Giorgos Lyggeridis. Zjarrfikësi është pezulluar nga detyra dhe ndaj tij kanë nisur hetimet për rreth 28 krime, që ai dyshohet se i ka kryer për llogari të një organizate kriminale.
Disa nga veprat penale që ai akuzohet janë: vrasje me dashje, prodhim të mjeteve shpërthyese, mbajtje të mjeteve ndezëse dhe shpërthyese, zhvatje, grabitje me bashkëpunim, dhunë ndaj punonjësve të policisë, e shumë të tjera.
Vetëm se tani në këto mesazhe që kanë zbuluar nga belgët dhe francezës, Gjykata Evropiane e Drejtësisë ka vendosur që të mos përdoren si prova në proceset penale, pasi janë përftuar në mënyrë joligjore. Vendimi është marrë pasi me datë 19 tetor 2022, gjykata e Berlinit në Gjermani, i është drejtuar Gjykatës Europiane të Drejtësisë për të sqaruar, se si duhej të vepronte me bisedat e rrjeteve të kriptuara Encrochat dhe SkyeCC, që ishin përfituar nga një ndërhyrje e jashtme në sistem prej autoriteteve franceze. Afro 18 muaj më vonë, Gjykata Europiane e Drejtësisë shpalli vendimin e saj./ZËRI
