IZRAEL- Qindra mijëra njerëz kanë mbajtur një tubim në Tel Aviv, përpara lirimit të pritur të pengjeve izraelite nga Hamasi. Një turmë që vlerësohet të jetë qindra mijëra vetë u mblodh në Sheshin e Pengjeve në Izrael të shtunën në mbrëmje, duke duartrokitur presidentin amerikan, me brohoritje "Faleminderit, Trump", por edhe duke fishkëllyer kryeministrin Benjamin Netanyahu.
Duke iu drejtuar turmave, i dërguari special i SHBA-së, Steve Witkoff, tha se pengjet “po kthehen në shtëpi” dhe vlerësoi Donald Trumpin për bërjen e mundur të një armëpushimi në Gaza dhe një marrëveshjeje për kthimin e pengjeve.
Në Gaza, zyrtarët palestinezë thanë se rreth 500,000 njerëz ishin kthyer në Gazën veriore - e cila shtrihet në rrënoja - në dy ditët e fundit, pas tërheqjes së trupave izraelite. Ndërkohë, Egjipti konfirmoi se do të organizojë një samit të hënën për të finalizuar një marrëveshje që synon t'i japë fund luftës.
Më shumë se 20 udhëheqës, përfshirë Trump, do të marrin pjesë në samitin në Sharm El-Sheikh, tha një zëdhënës i presidencës egjiptiane. Presidenti francez Emmanuel Macron dhe kryeministri i Mbretërisë së Bashkuar Sir Keir Starmer konfirmohen se do të udhëtojnë për në Egjipt të hënën.
Trump pritet të vizitojë Izraelin të hënën përpara se të shkojë në Egjipt. Vajza e tij Ivanka dhe dhëndri Jared Kushner mbajtën gjithashtu një fjalim në tubimin në Tel Aviv të shtunën.
Tre anëtarë të organit më të lartë administrativ të Katarit - Amiri Diwan - vdiqën në një aksident me makinë pranë Sharm El-Sheikh, tha të dielën ambasada e Katarit në Egjipt. Katari ka qenë duke ndërmjetësuar në krizën e Gazës.
Sipas marrëveshjes së armëpushimit dhe lirimit të pengjeve të njoftuar të enjten, Hamasit iu dhanë 72 orë - deri në orën 12:00 sipas orës lokale (09:00 GMT) të hënën - për të liruar të 48 pengjet që mban ende pas dy vitesh lufte, 20 prej të cilëve supozohet se janë gjallë./ZËRI
