PRISHTINË – Kuvendi i Kosovës nuk ka miratuar këtë të enjte, 9 nëntor, rezolutëën e propozuar nga opozita, për mbështetje ekonomike për policët e Kosovës. Nga 84 deputetë që kanë marrë pjesë në votim, 25 prej tyre kanë votuar pro dhe asnjë kundër. Ndërsa 59 deputetë të Vetëvendosjes kanë abstenuar.
Votimi i Rezolutës për Policinë e Kosovës kishte dështuar në disa seanca. Kjo, pasi deputetët e partisë në pushtet kanë bojkuar seancën.
Grupi Parlamentar i Lëvizjes Vetëvendosje ka thënë se nuk do të marrë pjesë në seancat ku do të shqyrtohet kjo Rezolutë, me arsyetimin se opozita nuk ka hallin e policisë, por të pushtetit.
Rezoluta për Policinë që ka propozuar opozita
Rezoluta për Policinë, publikuar nga mediat e Kosovës, parasheh ndarjen e pagave shtesë për policinë, duke vlerësuar rrezikshmërinë e profesionit.
“Obligon Qeverinë e Republikës së Kosovës që brenda afatit 15 ditë nga miratimi i kësaj rezolute, të bëjë ndarjen e mjeteve të nevojshme financiare për pagesën e shtesës së rrezikshmërisë për Policinë e Kosovës dhe atë, në mënyre retroaktive nga dita e hyrjes në fuqi të Ligjit për Pagat në Sektorin Publikë(për secilin muaj)”, thuhet në pikën e parë të draft-rezolutës.
Gjithashtu, draft rezoluta propozon, që policëve të Kosovës t’ju paguhet sigurimi shëndetësor.
“Obligon Qeverinë e Republikës së Kosovës që të propozoj buxhetin e nevojshëm – për vitin e ri fiskal 2024, për mbulimin e pagesës së sigurimit shëndetësor për të gjithë zyrtarët policorë të Republikës së Kosovës, nga data 1 janar 2024”, thuhet në piken e dytë të Rezolutës.
Gjithashtu, në tjetër pikë parashihet dalja në pension të parakohshëm i policëve dhe i punonjësve të Inspektoratit.
“Obligon Qeverinë e Republikës së Kosovës që brenda afatit 60 ditore nga miratimi i kësaj rezolute, të marrë nismën për hartimin, propozimin dhe miratimin e Projektligjit për Pensionin të Parakohshëm të zyrtarëve policorë të Policisë së Kosovës dhe punonjësit e Inspektoratit”, thuhet në piken tre.
Ndërsa në pikën e fundit kërkohet që miratimi i ligjeve të bëhet në mënyrë të përshpejtuar.
“Zotohet që shqyrtimin parlament të projektligji nga pika 3 e kësaj rezolute, ta bëjë në procedurë të përshpejtuar në pajtim me rregullat e punës së Kuvendit”, thuhet në pikën e katërt të Rezolutës.
Rezoluta e përpiluar nga PDK, është përkrahur nga AAK dhe LDK. Mirëpo, LVV ka thënë se draft Rezoluta është e motivuar politikisht./Zëri.ai/
