IZRAEL- Kryeministri izraelit Benjamin Netanyahu u përball me kundërshtime nga kreu i ushtrisë për propozimin e tij për të pushtuar zonat e mbetura të Gazës që nuk i kontrollon tashmë gjatë një takimi të tensionuar tre-orësh, thanë tre zyrtarë izraelitë.
Eyal Zamir, shefi i shtabit ushtarak, e paralajmëroi kryeministrin se marrja e pjesës tjetër të Gazës mund ta bllokojë ushtrinë në territorin, nga i cili u tërhoq dy dekada më parë, dhe mund të çojë në dëmtim të pengjeve që mbahen atje, thanë burimet e informuara për takimin e së martës.
Ushtria izraelite thotë se tashmë kontrollon 75 përqind të Gazës pas gati dy vitesh lufte, e cila filloi kur grupi militant Hamas sulmoi komunitetet jugore izraelite në tetor 2023. Pjesa më e madhe e enklavës bregdetare të mbushur me njerëz është shkatërruar në luftë, e cila ka shkatërruar shtëpi, shkolla, xhami dhe spitale. Shumica e popullsisë është zhvendosur disa herë dhe grupet e ndihmës thonë se banorët janë në prag të urisë.
Megjithatë, kryeministri Netanyahu i hodhi poshtë kategorikisht këto propozime, duke kritikuar publikisht gjeneralin për “diskreditim të qeverisë”, pasi ishte bërë e ditur në media se Zamir po konsideron dorëheqjen.
Netanyahu thuhet se u përgjigj: “Mos kërcëno me dorëheqje në media. Nuk mund ta pranoj që çdo herë që kërcënon se nëse nuk i pranojmë planet e tua, do të largohesh. Djali im është 33 vjeç, është një burrë i rritur.”
Zamiri është përplasur vazhdimisht me kabinetin gjatë ditëve të fundit, veçanërisht për shkak të lëvizjes së qeverisë për të zgjeruar luftën në Gaza, sipas raporteve të shumta, dhe burime në Zyrën e Kryeministrit kanë sugjeruar se nëse ai kundërshton planin për të pushtuar Gazën, ai mund të japë dorëheqjen.
Ministri i Mbrojtjes Katz tentoi të qetësojë klimën e tensionuar me deklaratën se “në një takim të mbyllur, shefi i ushtrisë ka të drejtë dhe detyrimin të shprehë lirisht mendimet e tij”.
Vendimet përfundimtare pritet të merren nesër gjatë mbledhjes së kabinetit të kufizuar, përgjegjës për çështjet e sigurisë dhe mbrojtjes./ZËRI
