RUSI-Analistët dhe aktivistët paralajmërojnë se Rusia po ndjek një strategji të ngadaltë dhe graduale për të ndarë internetin e saj nga pjesa tjetër e botës, me pasoja të mëdha për miliona qytetarë që po përballen me kufizime të vazhdueshme.
Në dallim nga ndërprerjet e internetit në Iran më herët këtë vit, ky proces në Rusi është i pjesshëm dhe jo transparent. Ai përfshin ndërprerje të përshkallëzuara të internetit mobil në qytete dhe provinca, kufizime të trafikut të caktuar dhe bllokime të reja të Telegram, një aplikacion mesazhesh jetik për komunikimin dhe jetën e përditshme të shumicës së rusëve.
Presidenti ukrainas, Zelenskyy, e përshkroi situatën si “një hap 100 vjet mbrapa”, duke shkruar në X se rusët mund të kthehen në postën me letër, telegrafe dhe kuaj. Arturo Filastò, studiues në Open Observatory of Network Interference (OONI), tha se ndërprerja në Rusi është “më e fshehtë dhe më pak e dukshme” se në Iran, për shkak të decentralizimit të infrastrukturës së internetit dhe numrit të madh të ofruesve të pavarur të shërbimeve.
Që nga 20 marsi, të dhënat e OONI tregojnë se Telegram po bllokohet gjithnjë e më shumë, me prova të kryera në mbi 500 rrjete që tregojnë ndërhyrje të gjera. Një përdorues rus u shpreh me ironi: “Po kaloj në postën me pëllumb. Pagoj për internet dhe ndihem i vjedhur çdo muaj. Ata marrin paratë e mia dhe nuk shfrytëzoj përfitimet e qytetërimit!”
Analistët e Amnezia VPN, që zhvillon mjete për tejkalimin e censurës, thonë se bllokimet e Telegram tregojnë një kapacitet teknik më të madh se përpjekjet e mëparshme të censurës, duke përfshirë probleme qasje në më shumë se një duzinë rajonesh, përfshirë Moskën dhe Shën Petersburgun.
Autoritetet kanë paralajmëruar se Telegram mund të bllokohet plotësisht nga fillimi i prillit, ndërsa WhatsApp tashmë konsiderohet “i vdekur” dhe të dy aplikacionet pritet të zëvendësohen nga një shërbim i ri i kontrolluar nga shteti, Max.
Rusia ka ndërprerë gjithashtu rrjete mobile në pjesë të mëdha të vendit për mbi një vit, duke lejuar qasje vetëm në një “listë të bardhë” faqesh të miratuara. Qendra e Moskës u përball më parë me ndërprerje të plotë të internetit mobil, duke shkaktuar pengesa për bankat dhe komunikimin telefonik.
