KINË- Çdo natë, pasi kthehet në shtëpi nga puna, Chen hap laptopin dhe kalon në jetën e tij sekrete si "aktivist i infiltruar". Nga dhoma e tij e gjumit në Kinën lindore, ai kalon orë të tëra duke parë skena shumë grafike të denja për një film horror dhe duke u përpjekur të miqësohet me njerëz që do të ishin armiqtë e tij të betuar në jetën reale. Chen – një pseudonim për të mbrojtur identitetin e tij të vërtetë – është pjesë e një ekipi detektivësh interneti, misioni i të cilëve është të mbyllin një rrjet global të errët që gjymton dhe vret macet për të gjeneruar fitime. Një hetim ekskluziv i CNN tregon se gjatë vitit të kaluar, këto grupe janë zgjeruar dhe kanë fituar popullaritet në të gjithë botën - dhe janë zhvendosur në platforma më të zakonshme, duke përfshirë Telegram, X dhe YouTube.
Konsumatorët e këtyre videove shpesh kanë një fetishizëm seksual për mizorinë ndaj kafshëve - i njohur si "zoosadizëm" - duke marrë kënaqësi nga shikimi i vuajtjeve të kafshëve të pambrojtura.
"Është bërë një fenomen mjaft ndërkombëtar. Po ndodh shumë më shpesh nga sa kujtojnë njerëzit,"- tha Jenny Edwards, një kriminologe dhe specialiste në abuzimin seksual me kafshët, me bazë në Seattle. Aktivistët thonë se shumë nga torturuesit e maceve janë të vendosur në Kinë, ku nuk ka ligje kundër mizorisë ndaj kafshëve. Të mbrojtur nga një kulturë e dukshme pandëshkueshmërie, ata bëjnë video për "konsumatorët" në të gjithë botën - përfshirë Shtetet e Bashkuara, Mbretërinë e Bashkuar, Turqinë dhe Japoninë.
CNN i ka paraqitur pyetje qeverisë kineze në lidhje me këtë çështje, por deri më tani pa marrë përgjigje.
Në fshehtësi me torturuesit e maceve
Gjatë një hetimi disamujor, CNN u infiltrua në disa nga grupet e enkriptuara të bisedave në Kinë, të cilat po promovojnë dhe shpërndajnë video të torturave që u bëjnë maceve. Grupet e bisedave ofrojnë një pamje të një bote kriminale ku tortura banalizohet dhe festohet sikur të jetë pjesë e një loje video. CNN vëzhgoi anëtarët teksa shkëmbenin histori për shfrytëzime të supozuara dhe propozonin forma të reja të shthurjes. Chen ishte në grupe të ngjashme. Për vite me radhë, ai ka parë video të llahtarshme dhe është miqësuar me torturues për të mbledhur informacion të mjaftueshëm për t'i gjurmuar ata.
Ai është pjesë e një aleance aktivistësh të quajtur "Feline Guardians", të cilët shpresojnë se tërheqja e vëmendjes ndaj kësaj çështjeje do të ushtrojë presion mbi zbatimin e ligjit në nivel global që të ndërmarrin më shumë veprime - veçanërisht në Kinë.
“Kina po përjeton tani një valë abuzimi me macet që përfshin grupmosha nga nxënësit e shkollës fillore e deri te të moshuarit,"- tha Chen.
Chen thotë se numri i njerëzve të përfshirë në rrjetet me bazë në Kinë po “po rritet gjithnjë e më shumë” dhe përfshin edhe të huaj jashtë vendit. Të dhënat e mbledhura nga "Feline Guardians" treguan një rritje prej 500% të videove të reja me tortura që hidhen në grupet kineze të Telegram që ata monitorojnë nga qershori 2024-shkurt 2025. Një video e re që ngarkohet mesatarisht çdo 2.5 orë. Një pjesë e kësaj përmbajtjeje është gjithashtu e disponueshme në faqet kryesore të internetit, duke përfshirë një llogari në YouTube, e cila është parë nga CNN. Pasi CNN kërkoi koment, YouTube e hoqi kanalin dhe një zëdhënës tha se "përmbajtja me dhunë ose abuzim ndaj kafshëve nuk ka vend në YouTube".
'Ata trajtohen si të famshëm'
Më shumë se 5,000 milje larg nga Chen në Londër, aktivistja e Feline Guardians, Lara, ka monitoruar përhapjen globale të këtij përmbajtjeje.
“Fillon në Kinë, dhe pastaj ke njerëz që imitojnë këto video nga vende të tjera, (dhe) kemi fëmijë që janë të ekspozuar ndaj kësaj,”- tha Lara, e cila kërkoi të përdorte vetëm emrin e saj të parë për të shmangur hakmarrjen në internet. Ekziston një shtysë jo vetëm për të qenë në gjendje të marrësh kënaqësinë e torturimit të tmerrshëm të maceve, por edhe për reagimet dhe famën që ato marrin. Kur Lara mësoi për herë të parë për tregtinë e torturës ndaj maceve, ajo tha se reagimi i saj ishte "me siguri nuk ndodh kështu". Por shumë shpejt, asaj iu hapën sytë për shkallën e kësaj nënkulture të errët.
Në forumet e faqeve kryesore të internetit ku CNN hyri, anëtarët e komunitetit e quanin veten “dashamirës të maceve (cat lover)”, pjesërisht për të tallur dashamirësit e vërtetë të maceve, por edhe për të maskuar aktivitetet e tyre. Ata duket se e shohin veten si vigjilantë që synojnë të heqin qafe të gjitha “macet e liga” – ndoshta edhe për të ofruar një ndjenjë justifikimi për krimet e tyre.
Krijuesit madje reklamojnë mace specifike për “tortura sipas porosisë”, gjë që u mundëson blerësve të zgjedhin kafshën, mjetet dhe taktikat e vdekjes së tyre – të gjitha për një çmim. Këto video tregojnë macet që digjen të gjalla, apo që futen në blender dhe vriten të gjalla. Posterat promovues shpërndahen duke treguar një foto, emrin dhe moshën e maces, së bashku me "afatin e ruajtjes", duke treguar datën kur planifikojnë ta vrasin. "Sponsorët" nxiten të "kontaktojnë shërbimin ndaj klientit" për të dhënë ofertat e tyre.
"Ekziston një mentalitet sadist dhe i shtrembëruar për këta torturues, ku ata përpiqen ta zgjasin torturën sa më gjatë të jetë e mundur. Ka pasur raste të maceve që janë copëtuar dhe që u janë nxjerrë zorrët,"- tha Lara. Është zbuluar edhe metoda "T-Rex" për macet që u janë prerë këmbët e përparme dhe që duhet të qëndrojnë vetëm në këmbët e pasme.
Një 'fetish që nuk mund ta lë dot'
Një konsumator kinez që paguan rregullisht për këtë lloj përmbajtjeje të dhunshme pranon se kjo i jep një emocion seksual.
"Shikimi i këtyre videove më jep një kënaqësi shumë më të fortë sesa seksi,"- tha Zhang, i cili pranoi të fliste me CNN në telefon me kusht që të mos përdornim emrin e tij të vërtetë.
Zhang, një burrë i martuar në të njëzetat, tha se filloi të shihte video të torturës së kafshëve për herë të parë kur ishte adoleshent, pasi pa një reportazh në lajme për këtë fenomen.
"Është fetishi që nuk mund ta lë. Kjo është shumë më e vështirë për t’u lënë sesa cigaret."
Deri më tani, Zhang ka shpenzuar mijëra dollarë duke blerë video të torturave ndaj maceve përmes rrjeteve, të cilat mund të kushtojnë nga disa dollarë deri në 50 dollarë secila. Ai shtoi se gruaja e tij "nuk e di për këtë gjë" dhe ka të ngjarë të divorcohej prej tij nëse do ta dinte.
Zhang thotë se nuk ka mundësi të porosisë videot e personalizuara që kanë një çmim shumë më të lartë, shpesh mbi 1,300 dollarë. Por ai thotë se anëtarët e tjerë të grupeve zakonisht janë “njerëz të pasur”, të cilët ai pretendon se përfshijnë zyrtarë, programues dhe menaxherë, disa prej të cilëve tregojnë emrin, kompaninë ose departamentin qeveritar ku punojnë. Zhang thotë se në botën e jashtme ai është "mjaft normal" dhe kurrë nuk do të lëndonte një kafshë - dhe madje mban mace dhe qen si kafshë shtëpiake. Por ai pranon se i pëlqen të shohë gratë që torturojnë macet, veçanërisht nëse i shtypin me taka.
Kriminologia Jenny Edwards thotë se "shtytësi kryesor" i këtij fetishi është sadizmi - një "devijim seksual" që do të thotë: Të kesh ngacmim seksual nga shikimi i këtyre (videove) ose ndjesia e dhimbjes së shqetësimit dhe poshtërimit të të parit të një qenieje tjetër duke vuajtur.
Ajo thotë se zoosadistët shpesh i fshehin prirjet e tyre nga familjet dhe miqtë e tyre.
"Ata po bëjnë një jetë të dyfishtë, sepse kanë një jetë krejt tjetër që e mbajnë të ndarë plotësisht nga çdo gjë tjetër që bëjnë,"- tha Edwards.
Phaedra, një aktiviste e pavarur për të drejtat e kafshëve me bazë në SHBA, e cila kërkoi të jepte vetëm emrin e saj të parë, tha se ishte shënjestruar nga llogari anonime, pasi kishte nxjerrë në pah përmbajtje grafike të torturave. Si hakmarrje, disa nga abuzuesit përdorën fotografinë e Phaedra-s nga llogaria e saj në "X" për të krijuar pornografi të rreme të saj - dhe njëri madje përdori një foto të saj së bashku me macet e ngordhura dhe një tabelë ku shkruhej: Do të vijmë edhe tek ty Phaedra.
Në dhjetor 2024, ajo mori gjithashtu kërcënime me vdekje dhe përdhunim.
Në një moment, ajo u tmerrua - duke menduar se do ta zbulonin se ku jetonte dhe do të hynin nga dritarja e dhomës së saj të gjumit - por shtoi se "nuk ka më frikë prej tyre".
Chen, vullnetari i fshehtë, tha se shumica e njerëzve që takon në grupe janë burra të vetmuar që ndihen të lënë pas dore nga shoqëria. Ai i përshkroi ata si “incelë” – beqarë të pavullnetshëm – të cilët ndihen të refuzuar nga gratë dhe për këtë arsye marrin kënaqësi seksuale duke lënduar një kafshë që shumica e grave e duan.
Kompanitë e mediave sociale janë vënë nën presion për shkak se nuk kanë bërë mjaftueshëm për të parandaluar përhapjen e këtij lloj përmbajtjeje ekstreme, dhe në shumicën e vendeve, të paligjshme. CNN u dërgoi disa kërkesa për komente gjigantëve të teknologjisë mbi qasjen e tyre ndaj kësaj çështjeje. Derisa këto grupe të zhduken, për aktivistët, nuk ka zgjidhje tjetër veçse të vazhdojnë me misionin e tyre, pavarësisht ndikimit të madh në shëndetin e tyre mendor./ZËRI
Marrë dhe përkthyer nga CNN
