SERBI- Sekretari i Përgjithshëm të NATO-s, Jens Stoltenberg është takuar me presidentin e Serbisë, Aleksandër Vuçiç sot në Beograd. Në konferencën e përbashkët me Vuçiç, Stoltenberg komentoi sulmin e 24 shtatorit në veri të Kosovës dhe u shpreh se grumbullimi i forcave të ushtrisë serbe në afërsi të kufirit me Kosovën nuk ndihmon në qetësimin e situatës së tensionuar mes dy vendeve. Gjithashtu ai i kërkoi presidentit serb të bashkëpunojë për të vendosur autorët para drejtësisë.
“Të dy palët duhet t’i ulin tensionet dhe të vetëpërmbahen nga veprimet përshkallëzuese. Grumbullimi i forcave të Ushtrisë Serbe në afërsi të kufirit me Kosovën nuk do të ndihmonte në qetësimin e situatës. Për dy dekada, KFOR-i ka garantuar një mjedis të sigurt në Kosovë për të gjitha komunitetet, ne do të vazhdojmë ta bëjmë këtë. Në të vërtetë, disa anëtarë të NATO-s i mbijetuan disa sulmeve, në shtator pamë një shpërthim tjetër dhune në Kosovë, kjo nuk mund të lejohet, ata që e bënë atë duhet të sillen para drejtësisë, ne vërtet e mirëpresim që Serbia është e gatshme të bashkëpunojë për këto angazhime, të cilat ne i diskutuam gjithashtu. Pas kësaj dhune, NATO vendosi edhe 1000 ushtarë dhe armë të rënda në Kosovë”, tha Stoltenberg.
Më tej Stoltenberg, deklaroi se mbështet formimin e Asociacionit të komunave me shumicë serbe në Kosovë. Sipas tij, formimi i Asociacionit do të ishte çelësi për normalizimin e marrëdhënieve Kosovë-Serbi.
“Akumulimi i forcave të Forcave të Armatosura Serbe pranë vijës administrative nuk do të ndihmonte situatën, mirëpres dhe mbështes formimin e Asociacionit në Kosovë, do të ishte çelësi i normalizimit të marrëdhënieve, i bëj thirrje Beogradit dhe Prishtinës, të angazhohemi në dialog nën kujdesin e BE-së, kjo është mënyra e vetme për paqen dhe stabilitetin e qëndrueshëm”, tha Stoltenberg.
Pas takimit me Vuçiç, Stoltenberg do të takohet edhe me kryeministren e Serbisë Ana Brnabiç, raporton Tanjug. Sekretari i Përgjithshëm të NATO-s ditën e djeshme ka nisur një turne të vizitave në Ballkanin Perëndimor pas paralajmërimeve nga presidenti i Ukrainës, Volodymyr Zelensky, se Rusia “do të sigurohet që një vend ballkanik të hyjë në luftë me një tjetër”.
