HUNGARI-Ministri i Jashtëm hungarez Peter Szijjarta dyshohet se ka informuar rregullisht Ministrin e Jashtëm rus Sergei Lavrov lidhur me takimet dhe diskutimet e brendshme të Bashkimit Evropian, raportoi The Washington Post.
“Çdo takim i BE-së për vite me radhë e ka pasur Moskën në thelb pas tryezës”, i tha zyrtari gazetës Washington Post.
Sipas zyrtarit, ministri i jashtëm hungarez dilte gjatë pushimeve për të informuar Lavrovin mbi "çfarë është diskutuar" dhe zgjidhjet e mundshme që po shqyrtohen, duke i dhënë në fakt Rusisë një dritare për diskutimet e BE-së me dyer të mbyllura. Szijjarto nuk iu përgjigj kërkesës së Post për koment.
Raportimi vjen në mes të një shqyrtimi më të gjerë të lidhjeve të Hungarisë me Moskën. Që nga pushtimi i plotë i Ukrainës nga Rusia në shkurt 2022, Szijjártó ka bërë 16 vizita zyrtare në Moskë, më e fundit më 4 mars, kur u takua me Presidentin Vladimir Putin.
Artikulli i Washington Post për telefonatat është pjesë e një hetimi më të gjerë mbi përpjekjet ruse për të mbështetur kryeministrin Viktor Orbán përpara zgjedhjeve të ardhshme parlamentare të Hungarisë. Gazeta siguroi dhe vërtetoi — nëpërmjet një shërbimi evropian të inteligjencës — një raport të brendshëm nga shërbimi i inteligjencës së jashtme të Rusisë, SVR, i cili propozonte organizimin e një atentati të rremë ndaj Orbán për të zhvendosur fokusin e fushatës nga pakënaqësia ekonomike te siguria dhe stabiliteti.
Përtej propozimit për vrasje, dokumente shtesë të shqyrtuara nga Washington Post përshkruajnë operacione konkrete ruse që synojnë kandidatët e opozitës: video të gjeneruara nga inteligjenca artificiale që synojnë dëmtimin e kandidates së partisë Tisza, Mariya Gurzo, dhe një fushatë dezinformimi kundër një kandidati tjetër, Ervin Nagy, që përfshin akuza të sajuara për sulm, dokumente të falsifikuara dhe foto të shpërndara përmes mediave kombëtare dhe sociale.
