SHBA- Duke konfirmuar parashikimet, Donald Trump mbizotëroi lehtësisht mbi Nikki Haley në zgjedhjet paraprake republikane në Karolinën e Jugut. Një fitore e cila ka simbolikë të veçantë, pasi Haley shërbeu si Guvernator i këtij shteti nga viti 2011 deri në vitin 2017. Trump siguroi 60.5% kundrejt 38.8% të Haley.
“Është një ditë e mrekullueshme”, tha ish-presidenti amerikan menjëherë pasi u shpall fitorja e tij në Karolinën e Jugut.
Më pas, Donald Trump premtoi fitore kundër demokratit Joe Biden, të cilin e akuzoi për "shkatërrim të vendit".
“Do t’i themi: Xho, je pushuar nga puna! Dilni jashtë!”, tha ai nën duartrokitjet e mbështetësve të tij.
Trump shpreson që së shpejti ta detyrojë ish-ambasadoren e SHBA-së në OKB të largohet, por deri më tani 52-vjeçarja Nikki Haley po refuzon të largohet nga gara për nominimin republikan.
"Unë nuk po heq dorë nga lufta," përsëriti Haley para mbështetësve në Charleston.
"Unë nuk besoj se Donald Trump mund ta mposht Joe Biden," tha ajo./ZËRI
